ปกรณปริจฺเฉทโต ปเนส ธมฺมสงฺคณีวิภงฺคธาตุกถาปุคฺคลปญฺญตฺติกถาวตฺถุ- ยมกปฏฺฐานานํ สตฺตนฺนํ ปกรณานํ วเสน ฐิโตปิ. อยเมตฺถ อาจริยานํ สมานกถา. วิตณฺฑวาที ปนาห "กถาวตฺถุ กสฺมา คหิตํ, นนุ สมฺมาสมฺพุทฺธสฺส ปรินิพฺพานโต อฏฺฐารสวสฺสาธิกานิ เทฺว วสฺสสตานิ อติกฺกมิตฺวา โมคฺคลฺลิปุตฺตติสฺสตฺเถเรน เอตํ ฐปิตํ? ตสฺมา สาวกภาสิตตฺตา ฉฑฺเฑถ นนฺ"ติ. กึ ปน ฉปฺปกรณานิ อภิธมฺโมติ. เอวํ น วทามีติ. อถ กึ วทสีติ. สตฺตปฺปกรณานีติ. กตรํ คเหตฺวา สตฺต กโรสีติ. มหาธมฺมหทยํ นาม อตฺถิ, เอเตน สห สตฺตาติ. มหาธมฺมหทเย อปุพฺพํ นตฺถิ, กติปยา จ ปญฺหาวารา อวเสสา, กถาวตฺถุนา สทฺธึ สตฺตาติ. โน กถาวตฺถุนา มหาธาตุกถา นาม อตฺถิ, ตาย สทฺธึ สตฺตาติ. ๔- มหาธมฺมหทเย ตาว กติปยา จ ปญฺหาวารา อวเสสา, ๔- มหาธาตุกถายํ อปุพฺพํ นตฺถิ, อปฺปมตฺตกาว ตนฺติ อวเสสา, กถาวตฺถุนาว สทฺธึ สตฺตาติ.

สมฺมาสมฺพุทฺโธ หิ สตฺตปฺปกรณานิ เทเสนฺโต กถาวตฺถุํ ปตฺวา ยาว เอสา ปุคฺคลวาเท ๕- ตาว จตูสุ ปเญฺหสุ ทฺวินฺนํ ปญฺจกานํ วเสน อฏฺฐมุขวาทยุตฺติ, ตํ อาทิกํ กตฺวา สพฺพกถามคฺเคสุ อสมฺปุณฺณภาณวารมตฺตาย ปาลิยา มาติกํ ฐเปสิ. สา ปเนสา ตนฺติ "ปุคฺคโล อุปลพฺภติ สจฺฉิกฏฺฐปรมฏฺเฐนาติ ๖-? อามนฺตา. โย สจฺฉิกฏฺโฐ ปรมฏฺโฐ ตโต โส ปุคฺคโล อุปลพฺภติ สจฺฉิกฏฺฐปรมฏฺเฐนาติ? น เหวํ วตฺตพฺเพ. อาชานาหิ นิคฺคหํ ฯเปฯ ปุคฺคโล นูปลพฺภติ สจฺฉิกฏฺฐปรมฏฺเฐนาติ?

@๔-๔ ฉ.ม. อิเม ปาฐา น ทิสฺสนฺติ ๕ ฉ.ม. ปุคฺคลวาเร