ทฺวาทสเตรสโยชนปฺปมาโณ ปเทโส กสิณมณฺฑลํ วิย สมตโล อโหสิ. โส "เอตฺตเก ฐาเน สตฺตรตนมโย มณฺฑโป อุฏฺฐหตู"ติ จินฺเตตฺวา โอโลเกสิ. ตาวเทว ปฐวึ ภินฺทิตฺวา มณฺฑโป อุฏฺฐหิ. ตสฺส โสวณฺณมเยสุ ถมฺเภสุ รชตมยา ฆฏิกา ๒- อเหสุํ, รชตมเยสุ ถมฺเภสุ โสวณฺณมยา, มณิมเยสุ ปพาฬมยา ฆฏิกา, ปพาฬถมฺเภสุ มณิมยา, สตฺตรตนมเยสุ สตฺตรตนมยา ฆฏิกา อเหสุํ. ตโต "มณฺฑปสฺส อนฺตรนฺตเร ๓- กิงฺกิณิกชาลํ โอลมฺพตู"ติ โอโลเกสิ. สห โอโลกเนเนว กิงฺกิณิกชาลํ โอลมฺพิ, ยสฺส มนฺทวาเตริตสฺส ปญฺจงฺคิกสฺเสว ตุริยสฺส มธุรสทฺโท นิจฺฉรติ. ๔- ทิพฺพสงฺคีติวตฺตนกาโล วิย อโหสิ. "อนฺตรนฺตรา คนฺธทามมาลาทามานิ โอลมฺพนฺตู"ติ จินฺเตสิ. ตาวเทว ทามานิ โอลมฺพึสุ. "โกฏิสตสหสฺสสงฺขฺยานํ ภิกฺขูนํ อาสนานิ จ อาธารกานิ จ ปฐวึ ภินฺทิตฺวา อุฏฺฐหนฺตู"ติ จินฺเตสิ. ตาวเทว อุฏฺฐหึสุ. "โกเณ โกเณ ๕- เอเกกา อุทกจาฏิโย อุฏฺฐหนฺตู"ติ จินฺเตสิ, ตาวเทว อุทกจาฏิโยปิ อุฏฺฐหึสุ. สกฺโก เอตฺตกํ มาเปตฺวา พฺราหฺมณสฺส สนฺติกํ คนฺตฺวา "เอหิ พฺราหฺมณ ๖- ตว มณฺฑปํ โอโลเกตฺวา มยฺหํ ภตึ เทหี"ติ อาห. มหาปุริโส คนฺตฺวา มณฺฑปํ โอโลเกสิ. โอโลเกนฺตสฺเสวสฺส สกลสรีรํ ปญฺจวณฺณาย ปีติยา นิรนฺตรํ ผุฏฺฐํ อโหสิ, อถสฺส มณฺฑปํ โอโลเกตฺวา เอตทโหสิ "นายํ มณฺฑโป มนุสฺสภูเตน กโต, มยฺหํ ปน อชฺฌาสยคุณํ อาคมฺม อทฺธา สกฺกสฺส ภวนํ อุณฺหมโหสิ, ตโต สกฺเกน เทวรญฺญา อยํ มณฺฑโป การิโต ภวิสฺสตี"ติ. "น โข ปน เม ยุตฺตํ เอวรูเป มณฺฑเป เอกทิวสํเยว ทานํ ทาตุํ, สตฺตาหํ ทสฺสามี"ติ จินฺเตสิ.

พาหิรกทานํ หิ กิตฺตกมฺปิ ๗- สมานํ โพธิสตฺตานํ ตุฏฺฐึ กาตุํ น สกฺโกติ. อลงฺกตสีสํ ปน ฉินฺทิตฺวา อญฺชิตอกฺขีนิ อุปฺปาเฏตฺวา หทยมํสํ อุพฺพตฺเตตฺวา ๘-

@๔ ฉ.ม. นิคฺคจฺฉติ ๕ ม. โกเณสุ โกเณสุ ๖ ฉ.ม. อยฺย