นารทสฺส พุทฺธสฺส อปรภาเค เอกํ อสงฺเขยฺยํ อติกฺกมิตฺวา อิโต กปฺปสตสหสฺสมตฺถเก เอกสฺมึ กปฺเป เอโกเอว ปทุมุตฺตโร นาม พุทฺโธ อุทปาทิ.

ตสฺส นครํ หํสวตี นาม อโหสิ, ปิตา อานนฺโท นาม ขตฺติโย, มาตา สุชาตา นาม, เทวิโล ๔- จ สุชาโต จ เทฺว อคฺคสาวกา, สุมโน นามุปฏฺฐาโก, อมิตฺตา จ อสมา จ เทฺว อคฺคสาวิกา, สาลรุกฺโข ๕- โพธิ, สรีรํ อฏฺฐาสีติหตฺถุพฺเพธํ อโหสิ, สรีรปฺปภา สมนฺตโต ทฺวาทสโยชนานิ คณฺหิ, วสฺสสตสหสฺสํ อายูติ.

ตสฺส อปรภาเค ตึสกปฺปสตสหสฺสานิ ๖- อติกฺกมิตฺวา (อิโต ตึสกปฺปสหสฺสมตฺถเก) สุเมโธ จ สุชาโต จาติ เอกสฺมึ กปฺเป เทฺว พุทฺธา นิพฺพตฺตึสุ. สุเมธสฺสาปิ ตโย สาวกสนฺนิปาตา, ปฐมสนฺนิปาเต สุทสฺสนนคเร โกฏิสตขีณาสวา อเหสุํ, ทุติเย นวุติโกฏิโย, ตติเย อสีติโกฏิโย. ตทา โพธิสตฺโต อุตฺตโร นาม มาณโว ๗- หุตฺวา นิทหิตฺวา ฐปิตํเยว อสีติโกฏิธนํ วิสฺสชฺเชตฺวา พุทฺธปฺปมุขสฺส ภิกฺขุสํฆสฺส มหาทานํ ทตฺวา ธมฺมํ สุตฺวา สรเณสุ ปติฏฺฐาย นิกฺขมิตฺวา ปพฺพชิ. โสปิ นํ "อนาคเต พุทฺโธ ภวิสฺสสี"ติ พฺยากาสิ.