@๖ ฉ.ม. ชยเสโน สีวลา จ สุรามา จ เทฺว อคฺคสาวิกา, กณฺณิการรุกฺโข โพธิ, สรีรํ สฏฺฐิหตฺถุพฺเพธํ อโหสิ, วสฺสสตสหสฺสํ อายูติ.

ตสฺส อปรภาเค อิโต เทฺวนวุติกปฺปมตฺถเก ติสฺโส ปุสฺโสติ ๑- เอกสฺมึ กปฺเป เทฺว พุทฺธา นิพฺพตฺตึสุ. ติสฺสสฺส ปน ภควโต ตโย สาวกสนฺนิปาตา. ปฐมสนฺนิปาเต ภิกฺขูนํ โกฏิสตํ อโหสิ, ทุติเย นวุติโกฏิโย, ตติเย อสีติโกฏิโย. ตทา โพธิสตฺโต มหาโภโค มหายโส สุชาโต นาม ขตฺติโย หุตฺวา อิสิปพฺพชฺชํ ปพฺพชิตฺวา มหิทฺธิกภาวํ ปตฺวา "พุทฺโธ อุปฺปนฺโน"ติ สุตฺวา ทิพฺพมณฺฑารวปทุมปาริจฺฉตฺตกปุปฺผานิ อาทาย จตุปริสมชฺเฌ คจฺฉนฺตํ ตถาคตํ ปูเชสิ, อากาเส ปุปฺผวิตานํ หุตฺวา อฏฺฐาสิ. โสปิ นํ สตฺถา "อิโต เทฺวนวุติกปฺปมตฺถเก ๒- พุทฺโธ ภวิสฺสสี"ติ พฺยากาสิ.

ตสฺส ภควโต เขมํ นาม นครํ อโหสิ, ปิตา ชนสฏฺโฐ ๓- นาม ขตฺติโย, มาตา ปทุมา นาม, พฺรหฺมเทโว จ อุทโย จ เทฺว อคฺคสาวกา, สุมงฺคโล ๔- นามุปฏฺฐาโก, ปุสฺสา จ สุทตฺตา จ เทฺว อคฺคสาวิกา, อสนรุกฺโข โพธิ, สรีรํ อสีติหตฺถุพฺเพธํ ๕- อโหสิ, วสฺสสตสหสฺสํ อายูติ.

ตสฺส อปรภาเค ปุสฺโส นาม สตฺถา อุทปาทิ. ตสฺสาปิ ตโย สาวกสนฺนิปาตา, ปฐมสนฺนิปาเต สฏฺฐี ภิกฺขุสตสหสฺสานิ อเหสุํ, ทุติเย ปญฺญาส, ตติเย ทฺวตฺตึส. ตทา โพธิสตฺโต วิชิตาวี นาม ขตฺติโย หุตฺวา มหารชฺชํ ปหาย สตฺถุ สนฺติเก ปพฺพชิตฺวา ตีณิ ปิฏกานิ อุคฺคเหตฺวา มหาชนสฺส ธมฺมกถํ กเถสิ. สีลปารมิญฺจ ปูเรสิ. โสปิ นํ "พุทฺโธ ภวิสฺสสี"ติ พฺยากาสิ.