ตสฺส ภควโต กาสิ นาม นครํ อโหสิ, ชยเสโน นาม ราชา ปิตา, สิริมา นาม มาตา, สุรกฺขิโต จ ธมฺมเสโน จ เทฺว อคฺคสาวกา, สภิโย นามุปฏฺฐาโก, จาลา จ อุปจาลา จ เทฺว อคฺคสาวิกา, อามลกรุกฺโข โพธิ, สรีรํ อฏฺฐปญฺญาสหตฺถุพฺเพธํ อโหสิ, นวุติวสฺสสหสฺสานิ อายูติ.

@๓ ฉ.ม. ชนสนฺโธ ๔ ฉ. สมงฺโค ๕ ฉ.ม. สฏฺฐิหตฺถุพฺเพธํ

ตสฺส อปรภาเค อิโต เอกนวุติกปฺเป วิปสฺสี ภควา อุทปาทิ. ตสฺสาปิ ตโย สาวกสนฺนิปาตา, ปฐมสนฺนิปาเต อฏฺฐสฏฺฐี ภิกฺขุสตสหสฺสานิ อเหสุํ, ทุติเย เอกสตสหสฺสํ, ตติเย เอกอสีติสหสฺสานิ. ๑- ตทา โพธิสตฺโต มหิทฺธิโก มหานุภาโว อตุโล นาม นาคราชา หุตฺวา สตฺตรตนขจิตํ สุวณฺณมหาปีฐํ ภควโต อทาสิ. โสปิ นํ สตฺถา "อิโต เอกนวุติกปฺเป พุทฺโธ ภวิสฺสสี"ติ พฺยากาสิ.