กกุสนฺธสฺส ภควโต เขมํ นาม นครํ อโหสิ, อคฺคิทตฺโต นาม พฺราหฺมโณ ปิตา, วิสาขา นาม พฺราหฺมณี มาตา, วิธูโร จ สญฺชีโว จ เทฺว อคฺคสาวกา, วุฑฺฒิโช ๖- นามุปฏฺฐาโก, สามา จ สรพฺภา ๗- จ เทฺว อคฺคสาวิกา, มหาสิรีสรุกฺโข โพธิ, สรีรํ จตฺตาฬีสหตฺถุพฺเพธํ อโหสิ, จตฺตาฬีส วสฺสสหสฺสานิ อายูติ.
ตสฺส อปรภาเค โกนาคมโน ๘- นาม สตฺถา อุทปาทิ. ตสฺสาปิ เอโก สาวกสนฺนิปาโต, ตตฺถ ตึส ภิกฺขุสหสฺสานิ อเหสุํ. ตทา โพธิสตฺโต ปพฺพโต นาม ราชา หุตฺวา อมจฺจคณปริวุโต สตฺถุ สนฺติกํ คนฺตฺวา ธมฺมเทสนํ สุตฺวา พุทฺธปฺปมุขํ ภิกฺขุสํฆํ นิมนฺเตตฺวา มหาทานํ ปวตฺเตตฺวา ปคุณจีนปฏโกเสยฺยกมฺพลทุกุลานิ ๙- เจว สุวณฺณปฏากญฺจ ๑๐- ทตฺวา สตฺถุ สนฺติเก ปพฺพชิ. โสปิ นํ สตฺถา พฺยากาสิ.
@๔ ฉ.ม. นิพฺพตฺตา ๕ ก. อญฺชนานิ เภสชฺชานิ ๖ ฉ.ม. พุทฺธิโช