ตทนนฺตรํ ยมกํ นาม ปกรณํ. ตํ "มูลยมกํ ขนฺธยมกํ อายตนยมกํ ธาตุยมกํ สจฺจยมกํ สงฺขารยมกํ อนุสยยมกํ จิตฺตยมกํ ธมฺมยมกํ อินฺทฺริยยมกนฺ"ติ ทสวิเธน วิภตฺตํ. ตํ วาจนามคฺคโต วีสติภาณวารสตมตฺตํ, ๑- วิตฺถารโต ปน อนนฺตมปริมาณํ โหติ.

ตทนนฺตรํ มหาปกรณํ นาม. ปฏฺฐานนฺติปิ ตสฺเสว นามํ. ตํ "เหตุปจฺจโย อารมฺมณปจฺจโย อธิปติปจฺจโย อนนฺตรปจฺจโย สมนนฺตรปจฺจโย สหชาตปจฺจโย อญฺญมญฺญปจฺจโย นิสฺสยปจฺจโย อุปนิสฺสยปจฺจโย ปุเรชาตปจฺจโย ปจฺฉาชาตปจฺจโย อาเสวนปจฺจโย กมฺมปจฺจโย วิปากปจฺจโย อาหารปจฺจโย อินฺทฺริยปจฺจโย ฌานปจฺจโย มคฺคปจฺจโย สมฺปยุตฺตปจฺจโย วิปฺปยุตฺตปจฺจโย อตฺถิปจฺจโย นตฺถิปจฺจโย วิคตปจฺจโย อวิคตปจฺจโย"ติ ปจฺจยวเสน ตาว จตุวีสติวิเธน วิภตฺตํ.

อิมสฺมึ ปน ฐาเน ปฏฺฐานํ สมาเนตพฺพํ:- กุสลตฺติกาทโย หิ พาวีสติติกา นาม. เหตู ธมฺมา นเหตู ธมฺมา ฯเปฯ สรณา ธมฺมา อรณา ธมฺมาติ อิเม

เปฯ ขเย ญาณํ อนุปฺปาเท ญาณนฺติ ทฺวาจตฺตาฬีสสุตฺตนฺติกทุกา นาม. เตสุ ทฺวาวีสติติกา สตทุกาติ อยํ อาหจฺจ ภาสิตา ชินวจนภูตา สพฺพญฺญุตญาณพุทฺเธน ๑- เทสิตา สตฺตนฺนํ ปกรณานํ มาติกา นาม. อถาปเร ทฺวาจตฺตาฬีสสุตฺตนฺติกทุกา กุโต ปภวา เกน ฐปิตา เกน เทสิตาติ. ธมฺมเสนาปติ สาริปุตฺตตฺเถรปฺปภวา, เตน ฐปิตา เตน เทสิตาติ. อิเม ฐเปนฺโต ปน เถโร น สามุกฺกํสิเกน อตฺตโน ญาเณน ฐเปสิ. เอกุตฺตริยํ ปน เอกนิปาตาทิสงฺคีติ ๒- ทสุตฺตรสุตฺตนฺเตหิ สโมธาเนตฺวา อาภิธมฺมิกตฺเถรานํ สุตฺตนฺตํ ปตฺวา อกิลมตฺถํ ฐปิตา. เตน ๓- ปเนเต เอกสฺมึ นิกฺเขปกณฺเฑเยว มตฺถกํ ปาเปตฺวา วิภตฺตา, เสสฏฺฐาเนสุ ยาว สรณทุกา อภิธมฺโม วิภตฺโต.