สเทวกํ ตารยนฺโต พุชฺฌสฺสุ อมตํ ปทนฺ"ติ. ๓-

เอวํ พุทฺธภาวตฺถาย อายาจิโต กาลํ ทีปํ เทสํ กุลํ ชเนตฺติยา อายุปริมาณนฺติ ๔- อิมานิ ปญฺจ มหาวิโลกนานิ วิโลเกตฺวา กตสนฺนิฏฺฐาโน ตโต จุโต สกฺยราชกุเล ปฏิสนฺธึ คเหตฺวา ตตฺถ มหาสมฺปตฺติยา ปริจาริยมาโน ๕- อนุกฺกเมน ภทฺรโยพฺพนํ อนุปาปุณิ. อิมสฺมึ อนฺตเร "สโต สมฺปชาโน อานนฺท โพธิสตฺโต ตุสิตกายา จวิตฺวา มาตุกุจฺฉึ โอกฺกมี"ติอาทีนํ ๖- สุตฺตปทานญฺเจว เตสํ อฏฺฐกถาย จ วเสน วิตฺถาโร เวทิตพฺโพ.

โส ติณฺณํ อุตูนํ อนุจฺฉวิเกสุ ตีสุ ปาสาเทสุ เทวโลกสทิสรชฺชสิรึ ๗- อนุภวมาโน อุยฺยานกีฬาย คมนสมเย อนุกฺกเมน ชิณฺณพฺยาธิมตสงฺขาเต ตโย เทวทูเต ทิสฺวา สญฺชาตสํเวโค ตโต นิวตฺติตฺวา จตุตฺถวาเร ปพฺพชิตํ ทิสฺวา "สาธุ ปพฺพชฺชา"ติ ปพฺพชฺชาย รุจึ อุปฺปาเทตฺวา อุยฺยานํ คนฺตฺวา ตตฺถ ทิวสภาคํ เขเปตฺวา มงฺคลโปกฺขรณีตีเร นิสินฺโน กปฺปกเวสํ คเหตฺวา อาคเตน วิสฺสุกมฺมเทวปุตฺเตน อลงฺกตปฏิยตฺโต ราหุลกุมารสฺส ๘- ชาตสาสนํ สุตฺวา ปุตฺตสิเนหสฺส พลวภาวํ ญตฺวา "ยาว อิทํ พนฺธนํ น วฑฺฒติ, ตาวเทว นํ ฉินฺทิสฺสามี"ติ จินฺเตตฺวา สายํ นครํ ปวิสนฺโต:-

"นิพฺพุตา นูน สา มาตา นิพฺพุโต นูน โส ปิตา