[๑๑] เสกฺขตฺติเก ตีสุ สิกฺขาสุ ชาตาติ เสกฺขา, สตฺตนฺนํ เสกฺขานํ เอเตติปิ เสกฺขา, อปริโยสิตสิกฺขตาย สยเมว สิกฺขนฺตีติปิ เสกฺขา. อุปริ สิกฺขิตพฺพาภาวโต น เสกฺขาติ อเสกฺขา, วุฑฺฒิปฺปตฺตา วา เสกฺขาติปิ อเสกฺขา, อรหตฺตผลธมฺมานํ เอตํ อธิวจนํ. ตติยปทํ อุภยปฏิกฺเขเปน วุตฺตํ.
[๑๒] ปริตฺตตฺติเก สมนฺตโต ขณฺฑิตตฺตา อปฺปมตฺตกํ ปริตฺตนฺติ วุจฺจติ "ปริตฺตํ โคมยปิณฺฑนฺ"ติอาทีสุ ๑- วิย, อิเมปิ อปฺปานุภาวตาย ปริตฺตา วิยาติ ปริตฺตา, กามาวจรธมฺมานเมตํ อธิวจนํ. กิเลสวิกฺขมฺภนสมตฺถตาย วิปุลผลตาย ทีฆสนฺตานตาย จ มหนฺตภาวํ คตา, มหนฺเตหิ วา โอฬารจฺฉนฺทวิริยจิตฺตปญฺเญหิ คตา ปฏิปนฺนาติปิ มหคฺคตา. ปมาณกรา ธมฺมา ราคาทโย ปมาณํ นาม, อารมฺมณโต วา สมฺปโยคโต วา นตฺถิ เอเตสํ ปมาณํ ปมาณสฺส จ ปฏิปกฺขาติ อปฺปมาณา.
[๑๓] ปริตฺตารมฺมณตฺติเก ปริตฺตํ อารมฺมณํ เอเตสนฺติ ปริตฺตารมฺมณา. เสสปททฺวเยปิ เอเสว นโย.
[๑๔] หีนตฺติเก หีนาติ ลามกา อกุสลา ธมฺมา. หีนปฺปณีตานํ มชฺเฌ ภวาติ มชฺฌิมา, อวเสสา เตภูมิกา ธมฺมา. อุตฺตมฏฺเฐน อติปฺปกฏฺเฐน จ ปณีตา, โลกุตฺตรา ธมฺมา.