[๒๖-๓๑] คนฺถโคจฺฉเก ยสฺส สํวิชฺชนฺติ, ตํ จุติปฏิสนฺธิวเสน วฏฺฏสฺมึ คนฺเถนฺติ ฆเฏนฺตีติ คนฺถา. ตโต อญเญ โน คนฺถา. อารมฺมณกรณวเสน คนฺเถหิ คนฺถิตพฺพาติ คนฺถนิยา. เสสํ เหตุโคจฺฉเก วุตฺตนเยเนว โยเชตพฺพํ. ยถา จ อิธ, เอวํ อิโต ปเรสุปิ วุตฺตาวเสสํ ตตฺถ ตตฺถ วุตฺตนเยเนว เวทิตพฺพํ.

[๓๒-๓๗] โอฆโคจฺฉเก ยสฺส สํวิชฺชนฺติ, ตํ วฏฺฏสฺมึ โอฆนนฺติ ๒- โอสีทาเปนฺตีติ โอฆา. อารมฺมณํ กตฺวา อติกฺกมนียโต โอเฆหิ อติกฺกมิตพฺพาติ โอฆนิยา. โอฆานํ อารมฺมณธมฺมาเอว เวทิตพฺพา.

[๓๘-๔๓] โยคโคจฺฉเก ๓- ยสฺส สํวิชฺชนฺติ, ตํ ๓- วฏฺฏสฺมึ โยเชนฺตีติ โยคา. โยคนิยา โอฆนิยา วิย เวทิตพฺพา.

[๔๔-๔๙] นีวรณโคจฺฉเก จิตฺตํ นีวรนฺติ ปริโยนทฺธนฺตีติ ๔- นีวรณา. นีวรณิยา สญฺโญชนิยา วิย เวทิตพฺพา.