ยา หิ เอสา สาธารณผลนิปฺผาทกตฺเตน สณฺฐิตา ปจฺจยานํ สามคฺคี, สา อิธ "สมวาโย"ติ ญาตพฺพา. "เอโกว โข ภิกฺขเว ขโณ จ สมโย จ พฺรหฺมจริยวาสายา"ติ ๔- เอวํ วุตฺโต ปน นวโม ขโณ "เอโก ขโณ"ติ เวทิตพฺโพ. ยานิ วา ปเนตานิ "จตฺตาริมานิ ภิกฺขเว จกฺกานิ, เยหิ สมนฺนาคตานํ เทวมนุสฺสานํ จตุจกฺกํ ปวตฺตตี"ติ เอตฺถ ปฏิรูปเทสวาโส สปฺปุริสูปสฺสโย ๕- อตฺตสมฺมาปณิธิ ปุพฺเพ จ กตปุญฺญตาติ ๖- จตฺตาริ จกฺกานิ วุตฺตานิ, ตานิ วา เอกชฺฌํ กตฺวา โอกาสฏฺเฐน "ขโณ"ติ เวทิตพฺพานิ. ๗- ตานิ หิ จตุจกฺกานิ กุสลุปฺปตฺติยา โอกาสภูตานิ.

เอวํ สมวายญฺจ ขณญฺจ ญตฺวา อิตเรสุ:-

ตํ ตํ อุปาทาย ปญฺญตฺโต กาโล โวหารมตฺตโก

ปุญฺโช ผสฺสาทิธมฺมานํ สมูโหติ วิภาวิโต.