@๓ ฉ.ม. สวสวตฺติตาภิมาโน ๔ อภิ. ๓๔/๑๒๘๗/๒๙๔ กิเลสกาโม เจตฺถ กาเมตีติ กาโม, อิตโร ปน กามิยตีติ กาโม. ยสฺมึ ปน ปเทเส ทุวิโธเปโส กาโม ปวตฺติวเสน อวจรติ, โส จตุนฺนํ อปายานํ มนุสฺสานํ ฉนฺนญฺจ เทวโลกานํ วเสน เอกาทสวิโธ ปเทโส "กาโม เอตฺถ อวจรตี"ติ กามาวจโร สสตฺถาวจโร วิย. ยถา หิ ยสฺมึ ปเทเส สสตฺถปุริสา อวจรนฺติ, โส วิชฺชมาเนสุปิ อญฺเญสุ ทฺวิปฺปทจตุปฺปเทสุ อวจรนฺเตสุ เตสํ อภิลกฺขิตตฺตา "สสตฺถาวจโร"เตฺวว วุจฺจติ. เอวํ วิชฺชมาเนสุปิ อญฺเญสุ รูปาวจราทีสุ ตตฺถ อวจรนฺเตสุ เตสํ อภิลกฺขิตตฺตา อยํ ปเทโส "กามาวจโร"เตฺวว วุจฺจติ. สฺวายํ ยถา รูปภโว รูปํ, เอวํ อุตฺตรปเท โลปํ กตฺวา "กาโม"เตฺวว วุจฺจติ. เอวมิทํ จิตฺตํ อิมสฺมึ เอกาทสปเทสสงฺขาเต กาเม อวจรตีติ กามาวจรํ.

กิญฺจาปิ หิ เอตํ รูปารูปภเวสุปิ อวจรติ, ยถา ปน สงฺคาเม อวจรณโต "สงฺคามาวจโร"ติ ลทฺธนาโม นาโค นคเร จรนฺโตปิ "สงฺคามาวจโร"เตฺวว วุจฺจติ. ถลชลจรา จ พหู ปาณาทโย อถเล อชเล จ ฐิตาปิ "ถลจฺจรา ชลจฺจรา"เตฺวว วุจฺจนฺติ. เอวมิทํ อญฺญตฺถ อวจรนฺตมฺปิ กามาวจรเมวาติ เวทิตพฺพํ. อารมฺมณกรณวเสน วา เอตฺถ กาโม อวจรตีติปิ กามาวจรํ. กามญฺเจส รูปารูปาวจเรสุปิ อวจรติ. ยถา ปน "วทตีติ วจฺโฉ, มหิยํ เสตีติ มหิโส"ติ วุตฺเต น สตฺตา ยตฺตกา วทนฺติ, มหิยํ วา เสนฺติ, สพฺเพสํ ตํ นามํ โหติ, เอวํ สมฺปทมิทํ เวทิตพฺพํ. อปิจ กามภวสงฺขาเต กาเม ปฏิสนฺธึ อวจาเรตีติปิ กามาวจรํ.

กุสลนฺติ กุจฺฉิตานํ สลนาทีหิ อตฺเถหิ กุสลํ. อปิจ อาโรคฺยฏฺเฐน อนวชฺชฏฺเฐน โกสลฺยสมฺภูตฏฺเฐน จ กุสลํ, ยเถว หิ "กจฺจิ นุ โภโต กุสลนฺ"ติ ๑- รูปกาเย อนาตุรตาย อเคลญฺเญน นิพฺยาธิตาย อาโรคฺยฏฺเฐน กุสลํ วุตฺตํ. เอวํ อรูปธมฺเมว กิเลสาตุรตาย กิเลสเคลญฺญสฺส จ กิเลสพฺยาธิโน จ อภาเวน อาโรคฺยฏฺเฐน กุสลํ เวทิตพฺพํ. กิเลสวชฺชสฺส ปน กิเลสโทสสฺส กิเลสทรถสฺส จ อภาวา อนวชฺชฏฺเฐน กุสลํ, โกสลฺลํ วุจฺจติ ปญฺญา, โกสลฺลโต สมฺภูตตฺตา โกสลฺยสมฺภูตฏฺเฐน กุสลํ.