ตตฺถ ทานมยํ ตาว ยทา เภริอาทีนิ คเหตฺวา สหตฺถา อุปหารํ กโรติ, นิจฺจูปหารตฺถาย ฐเปนฺโตปิ สหตฺถา ฐเปติ, "สทฺททานํ เม"ติ ธมฺมสฺสวนํ โฆเสตุํ คจฺฉติ, ธมฺมกถํ สรภญฺญํ กาตุํ วา คจฺฉติ, ตทา กายกมฺมํ โหติ. ยทา "คจฺฉถ ตาตา, อมฺหากํ สทฺททานํ ติณฺณํ รตนานํ อุปหารํ กโรถา"ติ อาณาเปติ, "สทฺททานํ เม"ติ เจติยงฺคเณ ๒- "อิมํ เภรึ, อิมํ มุทิงฺคํ ฐเปถา"ติ อาณาเปติ, สยเมว ธมฺมสฺสวนํ โฆเสติ, ธมฺมกถํ กเถติ, สรภญฺญํ ภณติ, ตทา วจีกมฺมํ โหติ. ยทา กายงฺควาจงฺคานิ อโจเปตฺวา "สทฺททานํ ทสฺสามี"ติ วิชฺชมานกวตฺถุํ มนสา ปริจฺจชติ, ตทา มโนกมฺมํ โหติ.

สีลมยมฺปิ "สทฺททานํ นาม มยฺหํ กุลวํโส กุลตนฺติ กุลปฺปเวณี"ติ เภริอาทีนิ สหตฺถา อุปหารํ กโรนฺตสฺส เภริอาทีนิ สหตฺถา เจติยงฺคณาทีสุ ฐเปนฺตสฺส ธมฺมกถิกานํ สรเภสชฺชํ สหตฺถา ททนฺตสฺส วตฺตสีเสน ธมฺมสฺสวนโฆสนธมฺมกถากถนสรภญฺญภณนตฺถาย จ คจฺฉนฺตสฺส กายกมฺมํ โหติ. "สทฺททานํ นาม อมฺหากํ กุลวํโส กุลตนฺติ กุลปฺปเวณิ, คจฺฉถ ตาตา, พุทฺธรตนาทีนํ อุปหารํ กโรถา"ติ อาณาเปนฺตสฺส กุลวํสวเสเนว อตฺตนา ธมฺมกถํ วา สรภญฺญํ วา กโรนฺตสฺส จ วจีกมฺมํ โหติ. "สทฺททานํ นาม มยฺหํ กุลวํโส, สทฺททานํ ทสฺสามี"ติ กายงฺควาจงฺคานิ อโจเปตฺวา มนสาว วิชฺชมานกวตฺถุํ ปริจฺจชนฺตสฺส มโนกมฺมํ โหติ.

ภาวนามยมฺปิ ยทา จงฺกมนฺโต สทฺเท ขยวยํ ปฏฺฐเปติ, ตทา กายกมฺมํ โหติ. กายงฺคํ วา ปน อโจเปตฺวา วาจาย สมฺมสนฺตสฺส วจีกมฺมํ โหติ. กายงฺควาจงฺคานิ อโจเปตฺวา มนสาว สทฺทายตนํ สมฺมสนฺตสฺส มโนกมฺมํ โหติ. เอวํ สทฺทารมฺมณมฺปิ กุสลํ ติวิธปุญฺญกิริยาวตฺถุวเสน นวหิ กมฺมทฺวาเรหิ ภาเชตฺวา ทสฺเสสิ ธมฺมราชา.