อิทญฺจ วตฺวา อิทํ สุตฺตํ อาภฏํ "ยถา มหาราช เทฺว เมณฺฑา ยุชฺเฌยฺยุํ, เตสุ ยถา เอโก เมณฺโฑ, เอวํ จกฺขุ ทฏฺฐพฺพํ. ยถา ทุติโย เมณฺโฑ, เอวํ รูปํ ทฏฺฐพฺพํ. ยถา เตสํ สนฺนิปาโต, เอวํ ผสฺโส ทฏฺฐพฺโพ. เอวํ ผุสนลกฺขโณ จ ผสฺโส สงฺฆฏนรโส จ. ยถา มหาราช เทฺว ปาณี สมฺมา วฏฺเฏยฺยุํ ๑- ฯเปฯ เทฺว ปาณี วฏฺเฏยฺยุํ. ยถา เอโก ปาณิ, เอวํ จกฺขุ ทฏฺฐพฺพํ. ยถา ทุติโย ปาณิ, เอวํ รูปํ ทฏฺฐพฺพํ. ยถา เตสํ สนฺนิปาโต, เอวํ ผสฺโส ทฏฺฐพฺโพ. เอวํ ผุสนลกฺขโณ จ ผสฺโส สงฺฆฏนรโส จา"ติ ๒- วิตฺถาโร.

ยถา วา "จกฺขุนา รูปํ ทิสฺวา"ติอาทีสุ ๓- จกฺขุวิญฺญาณาทีนิ จกฺขุอาทินาเมน วุตฺตานิ, เอวมิธาปิ ตานิ จกฺขุอาทินาเมเนว วุตฺตานีติ เวทิตพฺพานิ. ตสฺมา "เอวํ จกฺขุ ทฏฺฐพฺพนฺ"ติอาทีสุ "เอวํ จกฺขุวิญฺญาณํ ทฏฺฐพฺพนฺ"ติ อิมินา นเยน อตฺโถ เวทิตพฺโพ. เอวํ สนฺเต จิตฺตารมฺมณสงฺฆฏนโต อิมสฺมิมฺปิ สุตฺเต กิจฺจฏฺเฐเนว รเสน สงฺฆฏนรโสติ สิทฺโธ โหติ.

ติกสนฺนิปาตสงฺขาตสฺส ๔- ปน อตฺตโน การณสฺส วเสน ปเวทิตตฺตา สนฺนิปาตปจฺจุปฏฺฐาโน. อยญฺหิ ตตฺถ ตตฺถ "ติณฺณํ สงฺคติ ผสฺโส"ติ ๕- เอวํ การณสฺส