เอวํ เตมาสํ นิรนฺตรํ เทเสนฺตสฺส ปน ตถาคตสฺส กพฬิงฺการาหารปฏิพทฺธํ อุปาทินฺนกสรีรํ กถํ ยาเปสีติ? ปฏิชคฺคเนเนว. พุทฺธานํ หิ โส กาโล สุววฏฺฐิโต สุปริจฺฉินฺโน สุปจฺจเวกฺโข. ๑- ตสฺมา ภควา ธมฺมํ เทเสนฺโต มนุสฺสโลเก กาลํ โอโลเกติ. โส ภิกฺขาจารเวลํ สลฺลกฺเขตฺวา นิมฺมิตพุทฺธํ มาเปตฺวา "อิมสฺส จีวรคหณํ ปตฺตคหณํ สรกุตฺติ อากปฺโป จ เอวรูโป นาม โหตุ, เอตฺตกํ นาม ธมฺมํ เทเสตู"ติ อธิฏฺฐาย ปตฺตจีวรมาทาย อโนตตฺตทหํ คจฺฉติ. เทวตา นาคลตาทนฺตกฏฺฐํ เทติ. ตํ ขาทิตฺวา อโนตตฺตทเห สรีรํ ปฏิชคฺคิตฺวา มโนสิลาตเล ฐิโต สุรตฺตํ ทุปฏํ นิวาเสตฺวา จีวรํ ปารุปิตฺวา มหาราชทตฺติยํ ๒- เสลมยํ ปตฺตํ อาทาย อุตฺตรกุรุํ คจฺฉติ. ตโต ปิณฺฑปาตํ อาหริตฺวา อโนตตฺตทหตีเร นิสินฺโน ปริภุญฺชิตฺวา ทิวาวิหาราย จนฺทนวนํ คจฺฉติ.

ธมฺมเสนาปติ สาริปุตฺตตฺเถโรปิ ตตฺถ คนฺตฺวา สมฺมาสมฺพุทฺธสฺส วตฺตํ กตฺวา เอกมนฺตํ นิสีทิ. ๓- อถสฺส สตฺถา นยํ เทติ "สาริปุตฺต เอตฺตโก ธมฺโม เทสิโต"ติ อาจิกฺขติ. เอวํ สมฺมาสมฺพุทฺเธ นยํ เทนฺเต ปฏิสมฺภิทาปตฺตสฺส อคฺคสาวกสฺส เวลนฺเต ฐตฺวา หตฺถํ ปสาเรตฺวา ทสฺสิตสมุทฺทสทิสํ นยทานํ โหติ. เถรสฺสาปิ นยสเตน นยสหสฺเสน นยสตสหสฺเสน ภควตา เทสิตธมฺโม อุปฏฺฐาติเยว.

สตฺถา ทิวาวิหารํ นิสีทิตฺวา ธมฺมํ เทเสตฺวา ๔- กาย เวลาย คจฺฉตีติ? สาวตฺถีวาสีนํ สมฺปตฺตานํ ธมฺมเทสนเวลา นาม อตฺถิ, ตาย เวลาย คจฺฉติ. ธมฺมํ เทเสตฺวา คจฺฉนฺตํ วา อาคจฺฉนฺตํ วา เก ชานนฺติ, เก น ชานนฺติ? มเหสกฺขา เทวตา ชานนฺติ, อปฺเปสกฺขา น ชานนฺติ. กสฺมา น ชานนฺตีติ? สมฺมาสมฺพุทฺธสฺส วา นิมฺมิตพุทฺธสฺส วา รสฺมิอาทีสุ นานตฺตาภาวา. อุภินฺนมฺปิ หิ เตสํ รสฺมีสุ วา สเรสุ วา วจเนสุ วา นานตฺตํ นตฺถีติ. ๕-