อโลโภ เจตฺถ อาโรคฺยสฺส ปจฺจโย โหติ, อลุทฺโธ หิ โลภนียมฺปิ อสปฺปายํ น เสวติ, เตน อโรโค โหติ. อโทโส โยพฺพนสฺส, ๓- อทุฏฺโฐ หิ วลิตฺตจปลิตาวเหน ๔- โทสคฺคินา อฑยฺหมาโน ทีฆรตฺตํ ยุวา โหติ. อโมโห ทีฆายุกตาย, อมุโฬฺห หิ หิตาหิตํ ญตฺวา อหิตํ ปริวชฺชมาโน หิตญฺจ ปฏิเสวมาโน ทีฆายุโก โหติ.

อโลโภ เจตฺถ โภคสมฺปตฺติยา ปจฺจโย โหติ, อลุทฺธสฺส หิ จาเคน โภคปฏิลาโภ. อโทโส มิตฺตสมฺปตฺติยา อทุฏฺฐสฺส ๕- เมตฺตาย มิตฺตานํ ปฏิลาภโต เจว อปริหานโต ๖- จ. อโมโห อตฺตสมฺปตฺติยา, อมุโฬฺห หิ อตฺตโน หิตเมว กโรนฺโต อตฺตานํ สมฺปาเทติ. อโลโภ จ ทิพฺพวิหารสฺส ปจฺจโย โหติ, อโทโส พฺรหฺมวิหารสฺส, อโมโห อริยวิหารสฺส.

อโลเภน เจตฺถ สกปกฺเขสุ สตฺตสงฺขาเรสุ นิพฺพุโต โหติ เตสํ วินาเสน อภิสงฺคเหตุกสฺส ทุกฺขสฺส อภาวา. อโทเสน ปรปกฺเขสุ อทุฏฺฐสฺส เวรีสุปิ เวริสญฺญาย อภาวโต. อโมเหน อุทาสีนปกฺเขสุ อมุฬฺหสฺส สพฺพาภิสงฺคตาย อภาวโต.