เย วา ปน ตสฺมึ สมเย อญฺเญปิ อตฺถิ ปฏิจฺจสมุปฺปนฺนา อรูปิโน ธมฺมา, อิเม ธมฺมา กุสลาติ "ผสฺโส โหติ ฯเปฯ อวิกฺเขโป โหตี"ติ น เกวลํ ปทปฏิปาฏิยา อุทฺทิฏฺฐา อิเม ปโรปณฺณาสธมฺมาเอว, อถโข ยสฺมึ สมเย กามาวจรํ ติเหตุกํ โสมนสฺสสหคตํ ปฐมํ อสงฺขาริกํ มหาจิตฺตํ อุปฺปนฺนํ โหติ, ตสฺมึ สมเย เยวาปนกา ๒- อญฺเญปิ เตหิเยว ผสฺสาทีหิ สมฺปยุตฺตา หุตฺวา ปวตฺตมานา อตฺถิ อตฺตโน อตฺตโน อนุรูปํ ปจฺจยํ ปฏิจฺจ สมุปฺปนฺนา รูปาภาเวน อรูปิโน สภาวโต อุปลพฺภมานา ธมฺมา, สพฺเพปิ อิเม ธมฺมา กุสลาติ. ๓-

เอตฺตาวตา จิตฺตงฺควเสน ปาลิยํ อารุเฬฺห ปโรปณฺณาสธมฺเม ทีเปตฺวา เยวาปนกวเสน อปเรปิ นว ธมฺเม ธมฺมราชา ทีเปติ. เตสุ เตสุ หิ สุตฺตปเทสุ

อธิโมกฺโข อตฺถิ, มนสิกาโร อตฺถิ, ตตฺรมชฺฌตฺตตา อตฺถิ, เมตฺตาปุพฺพภาโค อตฺถิ, โส อโทเส คหิเต คหิโตเอว โหติ. กรุณาปุพฺพภาโค อตฺถิ, มุทิตาปุพฺพภาโค อตฺถิ, อุเปกฺขาปุพฺพภาโค อตฺถิ, โส ปน ตตฺรมชฺฌตฺตตาย คหิตาย คหิโตเอว โหติ. สมฺมาวาจา อตฺถิ, สมฺมากมฺมนฺโต อตฺถิ, สมฺมาอาชีโว อตฺถิ, จิตฺตงฺควเสน ปน ปาลึ อนารุโฬฺห, โสปิ อิธ เยวาปนกวเสน คหิโต.