อิมานิ ปน จตฺตาริ นานตฺตานิ น ผสฺเสเยว ลพฺภนฺติ, สพฺเพสุปิ ผสฺสปญฺจกาทีสุ ลพฺภนฺติ. ผสฺสสฺส หิ "ผสฺโส"ติ นามํ ฯเปฯ จิตฺตสฺส "จิตฺตนฺ"ติ. ผสฺโส จ ผุสนลกฺขโณ, เวทนา เวทยิตลกฺขณา, สญฺญา สญฺชานนลกฺขณา, เจตนา เจตยิตลกฺขณา, วิญฺญาณํ วิชานนลกฺขณํ. ตถา ผสฺโส ผุสนกิจฺโจ, เวทนา อนุภวนกิจฺจา, สญฺญา สญฺชานนกิจฺจา, เจตนา เจตนกิจฺจา, ๔- วิญฺญาณํ วิชานนกิจฺจนฺติ เอวํ กิจฺจนานตฺเตน นานตฺตํ เวทิตพฺพํ.

ปฏิกฺเขปนานตฺตํ ผสฺสปญฺจเก นตฺถิ. อโลภาทินิทฺเทเส ปน "อโลโภ อลุพฺภนา อลุพฺภิตตฺตนฺ"ติอาทินา นเยน ลพฺภตีติ เอวํ ปฏิกฺเขปนานตฺเตน นานตฺตํ เวทิตพฺพํ. เอวํ สพฺพปทนิทฺเทเสสุ ลพฺภมานวเสน จตุพฺพิธมฺปิ นานตฺตํ เวทิตพฺพํ.

@๓ องฺ. จตุกฺก. ๒๑/๔๔/๕๒ ๔ ฉ.ม. เจตยิตกิจฺจา