ปญฺจสีลํ วา ๑- อฏฺฐสีลํ วา ๑- ทสสีลํ วา ๑- สมาทิยนฺตสฺส "ปพฺพชิสฺสามี"ติ วิหารํ คจฺฉนฺตสฺส ปพฺพชนฺตสฺส มโนรถํ มตฺถกํ ปาเปตฺวา "ปพฺพชิโต วตมฺหิ สาธุ สาธู"ติ อาวชฺเชนฺตสฺส ๒- ปาฏิโมกฺขํ สํวรนฺตสฺส จีวราทโย ปจฺจเย ปจฺจเวกฺขนฺตสฺส อาปาถคเตสุ รูปาทีสุ จกฺขุทฺวาราทีนิ สํวรนฺตสฺส อาชีวํ โสเธนฺตสฺส จ ปวตฺตา เจตนา สีลมยํ ปุญฺญกิริยาวตฺถุ นาม.

ปฏิสมฺภิทายํ ๓- วุตฺเตน วิปสฺสนามคฺเคน จกฺขุํ อนิจฺจโต ทุกฺขโต อนตฺตโต ภาเวนฺตสฺส โสตํ ฯเปฯ มนํ รูเป ฯเปฯ ธมฺเม จกฺขุวิญฺญาณํ ฯเปฯ มโนวิญฺญาณํ จกฺขุสมฺผสฺสํ ฯเปฯ มโนสมฺผสฺสํ จกฺขุสมฺผสฺสชํ เวทนํ ฯเปฯ มโนสมฺผสฺสชํ เวทนํ รูปสญฺญํ ฯเปฯ ชรามรณํ ฯเปฯ อนิจฺจโต ทุกฺขโต อนตฺตโต ภาเวนฺตสฺส ปวตฺตา เจตนา, อฏฺฐตึสาย วา อารมฺมเณสุ อปฺปนํ อปฺปตฺตา สพฺพาปิ เจตนา ภาวนามยํ ปุญฺญกิริยาวตฺถุ นาม.

มหลฺลกํ ปน ทิสฺวา ปจฺจุคฺคมนปตฺตจีวรปฏิคฺคหณอภิวาทนมคฺคสมฺปทานาทิวเสน อปจิติสหคตํ เวทิตพฺพํ.

วุฑฺฒตรานํ วตฺตปฏิวตฺตกรณวเสน ๔- คามํ ปิณฺฑาย ปวิฏฺฐํ ภิกฺขุํ ทิสฺวา ปตฺตํ คเหตฺวา คาเม ภิกฺขํ สมาทเปตฺวา อุปสํหรณวเสน "คจฺฉ, ภิกฺขูนํ ปตฺตํ อาหรา"ติ สุตฺวา เวเคน คนฺตฺวา ปตฺตาหรณาทิวเสน จ กายเวยฺยาวฏิกกาเล เวยฺยาวจฺจสหคตํ เวทิตพฺพํ.