เอวํ อปริมาเณสุ จกฺกวาเฬสุ อปริมาณานํ สตฺตานํ กามาวจรโสมนสฺสสหคตญาณ- สมฺปยุตฺตอสงฺขาริกกุสลจิตฺตานิ เอกสฺส พหูนิ อุปฺปชฺชนฺติ, พหุนฺนมฺปิ พหูนิ อุปฺปชฺชนฺติ. ตานิ สพฺพานิปิ กามาวจรฏฺเฐน โสมนสฺสสหคตฏฺเฐน ญาณสมฺปยุตฺตฏฺเฐน อสงฺขาริกฏฺเฐน เอกตฺตํ คจฺฉนฺติ, เอกเมว โสมนสฺสสหคตํ ติเหตุกํ อสงฺขาริกํ มหาจิตฺตํ โหติ, ตถา สสงฺขาริกํ มหาจิตฺตํ ฯเปฯ ตถา อุเปกฺขาสหคตํ ญาณวิปฺปยุตฺตํ ทุเหตุกํ สสงฺขาริกํ จิตฺตนฺติ เอวํ สพฺพานิปิ อปริมาเณสุ จกฺกวาเฬสุ อปริมาณานํ สตฺตานํ อุปฺปชฺชมานานิ กามาวจรกุสลจิตฺตานิ สมฺมาสมฺพุทฺโธ มหาตุลาย ตุลยมาโน วิย ตุมฺเพ ปกฺขิปิตฺวา มินมาโน วิย สพฺพญฺญุตญาเณน ปริจฺฉินฺทิตฺวา "อฏฺเฐเวตานี"ติ สริกฺขฏฺเฐน อฏฺเฐว โกฏฺฐาเส กตฺวา ทสฺเสสิ.

@๔ ฉ. ทฬฺหธมฺมธนุคฺคหสฺส, สํ.ส. ๑๕/๑๐๗/๗๓, องฺ. จตุกฺก. ๒๑/๔๕/๕๓

@๕ ฉ.ม. ลหุเกน สเรน, สี.อสเนน