เอวํ ตาว ปาลิวเสเนว:-

พฺรหฺมุตฺตเมน กถิเต พฺรหฺมวิหาเร อิเม อิติ วิทิตฺวา

ภิยฺโย เอเตสุ อยํ ปกิณฺณกกถาปิ วิญฺเญยฺยา. ๑-

เอตาสุ หิ เมตฺตากรุณามุทิตาอุเปกฺขาสุ อตฺถโต ตาว เมชฺชตีติ เมตฺตา, สิเนหตีติ ๒- อตฺโถ. มิตฺเต วา ภวา, มิตฺตสฺส วา เอสา ปวตฺตีติปิ เมตฺตา. ปรทุกฺเข สติ สาธูนํ หทยกมฺปนํ กโรตีติ กรุณา, กิณาติ วา ปรทุกฺขํ หึสติ วินาเสตีติ กรุณา, กิริยติ วา ทุกฺขิเตสุ ผรณวเสน ปสาริยตีติ กรุณา. โมทนฺติ ตาย ตํสมงฺคิโน, สยํ วา โมทติ, โมทนมตฺตเมว วา ตนฺติ มุทิตา. "อเวรา โหนฺตู"ติอาทิพฺยาปาทปฺปหาเนน ๓- มชฺฌตฺตภาวูปคมเนน จ อุเปกฺขตีติ อุเปกฺขา.