[๓๗๕] นิทฺเทสวาเร จิตฺเตกคฺคตานิทฺเทเส ตาว สณฺฐิติ อวฏฺฐิตีติ อิทํ ทฺวยํ ฐิติเววจนเมว. ยํ ปน กุสลนิทฺเทเส "อารมฺมณํ โอคาเหตฺวา อนุปวิสิตฺวา ติฏฺฐตีติ อวฏฺฐิตี"ติ วุตฺตํ, ตํ อิธ น ลพฺภติ. อกุสลสฺมึ หิ ทุพฺพลา จิตฺเตกคฺคตาติ เหฏฺฐา ทีปิตเมว. อิทํ ทฺวยํ. ๑-

"อุทฺธจฺจวิจิกิจฺฉาวเสน ปวตฺตสฺส วิสาหารสฺส ปฏิปกฺขโต อวิสาหาโร"ติ เอวรูโปปิ อตฺโถ อิธ น ลพฺภติ. สหชาตธมฺเม ปน น วิสาหรตีติ ๒- อวิสาหาโร. น วิกฺขิปตีติ อวิกฺเขโป. อกุสลจิตฺเตกคฺคตาวเสน อวิสาหฏสฺส มานสสฺส ภาโว อวิสาหฏมานสตา. สหชาตธมฺเมสุ น กมฺปตีติ สมาธิพลํ. อยาถาวสมาธานโต มิจฺฉาสมาธีติ เอวมิธ อตฺโถ ทฏฺฐพฺโพ.

[๓๗๖] วิริยินฺทฺริยนิทฺเทเส โย เหฏฺฐา "นิกฺกโม เจโส กามานํ ปนุทนายา"ติอาทิ นโย วุตฺโต, โส อิธ น ลพฺภติ. สหชาตธมฺเมสุ อกมฺปนฏฺเฐเนว วิริยพลํ เวทิตพฺพํ.