@๔ ม. อุมฺมิลิตฺวา ๕ ฉ.ม. เตน สทฺเทน ๖ ฉ. สมฺปฏิจฺฉิตกาโล

เอตฺถ จ "ตฺวํ ภวงฺคํ นาม โหหิ, ตฺวํ อาวชฺชนํ นาม, ตฺวํ ทสฺสนํ นาม, ตฺวํ สมฺปฏิจฺฉนฺนํ นาม, ตฺวํ สนฺตีรณํ นาม, ตฺวํ โวฏฺฐานํ ๑- นาม, ตฺวํ ชวนํ นาม, ๒- ตฺวํ ตทาลมฺพนํ นาม ๒- โหหี"ติ โกจิ กตฺตา วา กาเรตา วา นตฺถิ.

อิมสฺมึ ปน ฐาเน ปญฺจวิธํ นิยามํ นาม คณฺหึสุ วีชนิยามํ, อุตุนิยามํ, กมฺมนิยามํ, ธมฺมนิยามํ, จิตฺตนิยามนฺติ. ตตฺถ กุลตฺถคจฺฉสฺส อุตฺตรคฺคภาโว, ทกฺขิณวลฺลิยา ทกฺขิณโต รุกฺขปริหรณํ, สุริยาวฏฺฏปุปฺผานํ สุริยาภิมุขภาโว, มาลุวลตาย ๓- รุกฺขาภิมุขคมนเมว, นาฬิเกรสฺส มตฺถกโต ๔- ฉิทฺทสพฺภาโวติ เตสํ เตสํ วีชานํ ตํตํสทิสผลทานํ วีชนิยาโม นาม. ตสฺมึ ตสฺมึ สมเย เตสํ เตสํ รุกฺขานํ เอกปฺปหาเรเนว ปุปฺผผลปลฺลวคฺคหณํ อุตุนิยาโม นาม. ติเหตุกกมฺมํ ติเหตุกทุเหตุกาเหตุกวิปากํ เทติ. ทุเหตุกกมฺมํ ทุเหตุกาเหตุกวิปากํ เทติ, ติเหตุกํ น เทตีติ เอวํ ตสฺส ตสฺส กมฺมสฺส ตํตํสทิสวิปากทานเมว กมฺมนิยาโม นาม.