อิมสฺมึ ฐาเน ปญฺจอุจฺฉุนาฬิยนฺโตปมํ ๒- นาม คณฺหึสุ. อุจฺฉุปีฬนสมเย กิร เอกสฺมา คามา เอกาทส ยนฺตพาหา ๓- นิกฺขมิตฺวา เอกํ อุจฺฉุวาฏํ ทิสฺวา ตสฺส ปริปกฺกภาวํ ญตฺวา อุจฺฉุสามิกํ อุปสงฺกมิตฺวา "ยนฺตพาหา มยนฺ"ติ อาโรเจสุํ. โส "อหํ ตุเมฺหเยว ปริเยสามี"ติ อุจฺฉุสาลํ เต คเหตฺวา อคมาสิ. เต ตตฺถ นาฬิยนฺตํ สชฺเชตฺวา ๔- "มยํ เอกาทส ชนา, อปรมฺปิ เอกํ ลทฺธุํ วฏฺฏติ, เวตเนน คณฺหถา"ติ อาหํสุ, อุจฺฉุสามิโก "อหเมว สหาโย ภวิสฺสามี"ติ อุจฺฉูนํ สาลํ ปูราเปตฺวา เตสํ สหาโย อโหสิ. เต อตฺตโน อตฺตโน กิจฺจานิ กตฺวา ผาณิตปกฺเกน ๕- อุจฺฉุรเส ปกฺเก คุฬพนฺธเกน พนฺเธ ๖- อุจฺฉุสามิเกน ตุลยิตฺวา ภาเคสุ ทินฺเนสุ อตฺตโน อตฺตโน ภาคํ อาทาย สาลํ สาลาสามิกสฺส ๗- ปฏิจฺฉาเปตฺวา ๘- เอเตเนว อุปาเยน อปราสุปิ จตูสุ สาลาสุ กมฺมํ กตฺวา ปกฺกมึสุ.

@๔ สี. โยเชตฺวา ๕ ฉ. ผาณิตปาจเกน, ม. ผาณิตปาเกเนว

@๖ ฉ.ม. พทฺเธ ๗ ฉ.ม. อุจฺฉุสาลํ สามิกสฺส ๘ ม. ปฏิจฺฉาเทตฺวา