"ทฺวาสีติ พุทฺธโต คณฺหิ ๑- เทฺว สหสฺสานิ ภิกฺขุโต

จตุราสีติสหสฺสานิ เย เม ธมฺมา ปวตฺติโน"ติ ๒- เอวํ ปริทีปิตธมฺมกฺขนฺธวเสน จตุราสีติสหสฺสปฺปเภทํ โหติ. ตตฺถ เอกานุสนฺธิกํ สุตฺตํ เอโก ธมฺมกฺขนฺโธ. ยํ อเนกานุสนฺธิกํ, ตตฺถ อนุสนฺธิวเสน ธมฺมกฺขนฺธคณนา. คาถาพนฺเธสุ ปญฺหาปุจฺฉนํ เอโก ธมฺมกฺขนฺโธ, วิสฺสชฺชนํ เอโก. อภิธมฺเม เอกเมกนฺติกทุกภาชนํ เอกเมกญฺจ จิตฺตวารภาชนํ เอโก ๓- ธมฺมกฺขนฺโธ. วินเย อตฺถิ วตฺถุ, อตฺถิ มาติกา, อตฺถิ ปทภาชนียํ, อตฺถิ อาปตฺติ, อตฺถิ อนาปตฺติ, อตฺถิ อนฺตราปตฺติ, อตฺถิ ติกจฺเฉโท, ๔- อตฺถิ อเตกิจฺโฉ, อตฺถิ สเตกิจฺโฉ. ๔- ตตฺถ เอกเมโก โกฏฺฐาโส เอกเมโก ธมฺมกฺขนฺโธติ เวทิตพฺโพ. เอวํ ธมฺมกฺขนฺธโต จตุราสีติ ธมฺมกฺขนฺธสหสฺสานิ.

เอวเมว ตํ สพฺพมฺปิ พุทฺธวจนํ ปญฺจสติกสงฺคีติกาเล สงฺคายนฺเตน มหากสฺสปปฺปมุเขน วสิคเณน "อยํ ธมฺโม อยํ วินโย, อิทํ ปฐมพุทฺธวจนํ อิทํ มชฺฌิมพุทฺธวจนํ อิทํ ปจฺฉิมพุทฺธวจนํ, อิทํ วินยปิฏกํ อิทํ สุตฺตนฺตปิฏกํ อิทํ อภิธมฺมปิฏกํ, อยํ ทีฆนิกาโย ฯเปฯ อยํ ขุทฺทกนิกาโย, อิมานิ สุตฺตาทีนิ นวงฺคานิ, อิมานิ จตุราสีติธมฺมกฺขนฺธสหสฺสานี"ติ อิมํ ปเภทํ ววฏฺฐเปตฺวาว สงฺคีตํ. น เกวลญฺจ อิมเมว, อญฺญมฺปิ อุทานสงฺคหวคฺคสงฺคหเปยฺยาลสงฺคหเอกกนิปาต- ทุกนิปาตาทินิปาตสงฺคหสํยุตฺตสงฺคหปณฺณาสกสงฺคหาทิมเนกวิธํ ตีสุ ปิฏเกสุ สนฺทิสฺสมานํ สงฺคหปฺปเภทํ ววฏฺฐเปตฺวาว สตฺตหิ มาเสหิ สงฺคีตํ.

สงฺคีติปริโยสาเน จสฺส "อิทํ มหากสฺสปตฺเถเรน ทสพลสฺส สาสนํ ปญฺจวสฺสสหสฺสปฺปริมาณกาลปฺปวตฺตนสมตฺถํ กตนฺ"ติ สญฺชาตปฺปโมทา สาธุการํ วิย ททมานา อยํ มหาปฐวี อุทกปริยนฺตํ กตฺวา อเนกปฺปการํ กมฺปิ สงฺกมฺปิ สมฺปกมฺปิ สมฺปเวธิ, อเนกานิ จ อจฺฉริยานิ ปาตุรเหสุํ.