มหาปริหารโตติ มหนฺเตหิ ปจฺจเยหิ ปริหริตพฺพโต. เอตานิ หิ ทิวเส ทิวเส อุปเนตพฺพตฺตา มหนฺเตหิ ฆาสจฺฉาทนาทีหิ ภูตานิ ปวตฺตานีติ มหาภูตานิ. มหาปริหารานิ วา ภูตานีติ มหาภูตานิ.

มหาวิการโตติ ภูตานํ มหาวิการโต. เอตานิ หิ อุปาทินฺนานิปิ อนุปาทินฺนานิปิ มหาวิการานิ โหนฺติ. ตตฺถ อนุปาทินฺนานํ กปฺปวุฏฺฐาเน วิการมหตฺตํ ปากฏํ โหติ, อุปาทินฺนานํ ธาตุกฺโขภกาเล. ตถา หิ:-

ภูมิโต วุฏฺฐิตา ยาว พฺรหฺมโลกา วิธาวติ

อจฺจิ อจฺจิมโต โลเก ทยฺหมานมฺหิ เตชสา.