[๑๑๒๖] อิสฺสานิทฺเทเส ยา ปรลาภสกฺการครุการมานนวนฺทนปูชนาทีสุ ๑- อิสฺสาติ ยา เอเตสุ ปเรสํ ลาภาทีสุ "กึ อิมินา อิเมสนฺ"ติ ปรสมฺปตฺติขียนลกฺขณา อิสฺสา. ตตฺถ ลาโภติ จีวราทีนํ จตุนฺนํ ปจฺจยานํ ปฏิลาโภ. อิสฺสุกี หิ ปุคฺคโล ปรสฺส ตํ ลาภํ ขียติ, "กึ อิมสฺส อิมินา"ติ น อิจฺฉติ. สกฺกาโรติ เตสํเยว ปจฺจยานํ สุกตานํ สุนฺทรานํ ปฏิลาโภ. ครุกาโรติ ครุกิริยา ภาริยกรณํ. มานนนฺติ มเนน ปิยกรณํ. วนฺทนนฺติ ปญฺจปติฏฺฐิเตน วนฺทนํ. ปูชนาติ คนฺธมาลาทีหิ ปูชนา. อิสฺสายนวเสน อิสฺสา. อิสฺสากาโร อิสฺสายนา. อิสฺสายิตภาโว อิสฺสายิตตฺตํ. อุสูยาทีนิ อิสฺสาทิเววจนานิ. ๒-

อิมิสฺสา ปน อิสฺสาย ขียนลกฺขณํ อาคาริเกนปิ อนาคาริเกนปิ เวทิตพฺพํ. ๓- อาคาริโกปิ เอกจฺโจ กสิวณิชฺชาทีสุ อญฺญตเรน อาชีเวน อตฺตโน ปุริสการํ นิสฺสาย ภทฺทกํ ยานํ วา วาหนํ วา รตนํ วา ลภติ. อิตโร ๔- ตสฺส อลาภตฺถิโก เตน ลาเภน น ตุสฺสติ, "กทา นุ โข เอส อิมิสฺสา สมฺปตฺติยา ปริหายิตฺวา กปโณ หุตฺวา ปริหายิสฺสตี"ติ ๕- จินฺเตตฺวา เอเกน การเณน ตสฺมึ ตาย สมฺปตฺติยา ปริหีเน อตฺตมโน โหติ. อนาคาริโกปิ เอโก อิสฺสามนโก อญฺญํ อตฺตโน สุตฺตปริยตฺติอาทีนิ นิสฺสาย อุปฺปนฺนลาภาทิสมฺปตฺตึ ทิสฺวา "กทา นุ โข เอส ๖- อิเมหิ ลาภาทีหิ ปริหายิสฺสตี"ติ จินฺเตตฺวา ยทา ตํ เอเกน การเณน ปริหีนํ ปสฺสติ, ตทา อตฺตมโน โหติ. เอวํ ปรสมฺปตฺติขียนลกฺขณา อิสฺสาติ เวทิตพฺพา.

[๑๑๒๗] มจฺฉริยนิทฺเทเส วตฺถุโต มจฺฉริยทสฺสนตฺถํ ปญฺจ มจฺฉริยานิ อาวาสมจฺฉริยนฺติอาทิ วุตฺตํ. ตตฺถ อาวาเส มจฺฉริยํ อาวาสมจฺฉริยํ. เสสปเทสุปิ เอเสว นโย.

อาวาโส นาม สกลาราโมปิ ปริเวณมฺปิ เอโกวรโกปิ รตฺติฏฺฐานาทีนิปิ. ๗- เตสุ วสนฺตา สุขํ วสนฺติ, ปจฺจเย ลภนฺติ. เอโก ภิกฺขุ วตฺตสมฺปนฺนสฺเสว เปสลสฺส ภิกฺขุโน ตตฺถ อาคมนํ น อิจฺฉติ, "อาคโตปิ ขิปฺปํ คจฺฉตู"ติ