อฏฺฐคุณสมูเปตนฺติ อฏฺฐหิ สมณสุเขหิ อุเปตํ. อฏฺฐิมานิ สมณสุขานิ นาม ธนธญฺญาทิปริคฺคหาภาโว, อนวชฺชปิณฺฑปริเยสนภาโว, ๑- นิพฺพุตปิณฺฑปริภุญฺชนภาโว, รฏฺฐํ ปีเฬตฺวา ธนสารํ วา ทาสีทาสกหาปณาทีนิ ๒- วา คณฺหนฺเตสุ ราชกุเลสุ รฏฺฐปีฬนกิเลสาภาโว, อุปกรเณสุ นิจฺฉนฺทราคภาโว, โจรวิโลเป นิพฺภยภาโว, ราชราชมหามตฺเตหิ อสํสฏฺฐภาโว, จตูสุ ทิสาสุ อปฺปฏิหตภาโวติ. อิทํ วุตฺตํ โหติ "ยถา ตสฺมึ อสฺสเม วสนฺเตน สกฺกา โหนฺติ ๓- อิมานิ อฏฺฐ สมณสุขานิ วินฺทิตุํ, เอวํ อฏฺฐคุณสมูเปตํ ตํ อสฺสมํ มาเปสินฺ"ติ.

อภิญฺญาพลมาหรินฺติ ปจฺฉา ตสฺมึ อสฺสเม วสนฺโต กสิณปริกมฺมํ กตฺวา อภิญฺญานญฺจ สมาปตฺตีนญฺจ อุปฺปาทนตฺถาย อนิจฺจโต ทุกฺขโต วิปสฺสนํ อารภิตฺวา ถามปฺปตฺตํ วิปสฺสนาพลมาหรึ. ยถา ตสฺมึ วสนฺโต ตํ พลํ อาหริตุํ สกฺโกมิ, เอวนฺตํ อสฺสมนฺตสฺส อภิญฺญตฺถาย วิปสฺสนาพลสฺส อนุจฺฉวิกํ กตฺวา มาเปสินฺติ อตฺโถ.

สาฏกํ ปชหึ ตตฺถ นวโทสมุปาคตํ

วากจีรํ นิวาเสสึ ทฺวาทสคุณมุปาคตนฺติ.