สาฏกํ ปชหึ ตตฺถ, นวโทสมุปาคตนฺติ เอตฺถายํ อนุปุพฺพิกถา:- ตทา กิร กุฏิเลณจงฺกมาทิปฏิมณฺฑิตํ ปุปฺผูปคผลูปครุกฺขสญฺฉนฺนํ รมณียํ มธุรสลิลาสยํ อปคตพาลมิคภึสนกสกุณํ ปวิเวกกฺขมํ อสฺสมํ มาเปตฺวา อลงฺกตจงฺกมสฺส อุโภสุ อนฺเตสุ อาลมฺพนผลกํ สํวิธาย นิสีทนตฺถาย จงฺกมนเวมชฺเฌ สมตลํ มุคฺควณฺณํ สิลํ มาเปตฺวา อนฺโตปณฺณสาลาย ชฏามณฺฑลวากจีรติทณฺฑกุณฺฑิกาทิเก ตาปสปริกฺขาเร มณฺฑเป ปานียฆฏปานียสงฺขปานียสราวกานิ ๔- อคฺคิสาลาย องฺคารกปลฺลทารุอาทีนีติ เอวํ ยํ ยํ ปพฺพชิตานํ อุปกรณาย ๕- สมฺปวตฺตติ, ตํ ตํ สพฺพํ มาเปตฺวา

@๔ สี. ปานียกูฏ.... ๕ ฉ.ม. อุปการาย ปณฺณสาลาย ภิตฺติยํ "เย เกจิ ปพฺพชิตุกามา อิเม ปริกฺขาเร คเหตฺวา ปพฺพชนฺตู"ติ อกฺขรานิ ฉินฺทิตฺวา เทวโลกเมว คเต วิสฺสุกมฺมเทวปุตฺเต สุเมธปณฺฑิโต หิมวนฺตปาเท คิริกนฺทรานุสาเรน อตฺตโน นิวาสานุรูปํ ผาสุกฏฺฐานํ วิจินนฺโต ๑- นทีนิวตฺตเน วิสฺสุกมฺมนิมฺมิตํ สกฺกทตฺติยํ รมณียํ อสฺสมปทํ ทิสฺวา จงฺกมโกฏิยํ คนฺตฺวา ปทวลญฺชํ อปสฺสนฺโต "ธุวปพฺพชิตา ธุรคาเม ภิกฺขํ ปริเยสิตฺวา กิลนฺตรูปา อาคนฺตฺวา ปณฺณสาลํ ปวิสิตฺวา นิสินฺนา ภวิสฺสนฺตี"ติ จินฺเตตฺวา โถกํ อาคเมตฺวา "อติวิย จิรายนฺติ, ชานิสฺสามี"ติ ปณฺณสาลทฺวารํ ๒- วิวริตฺวา อนฺโต ปวิสิตฺวา อิโต จิโต จ โอโลเกนฺโต มหาภิตฺติยํ อกฺขรานิ วาเจตฺวา "มยฺหํ กปฺปิยปริกฺขารา เอเต, อิเม คเหตฺวา ปพฺพชิสฺสามี"ติ อตฺตนา นิวตฺถปารุปนสาฏกยุคลํ ปชหิ. เตนาห "สาฏกํ ปชหึ ตตฺถา"ติ. เอวํ ปวิฏฺโฐหํ สาริปุตฺต ตสฺสํ ปณฺณสาลายํ สาฏกํ ปชหึ.

นวโทสมุปาคตนฺติ สาฏกํ ปชหนฺโต นว โทเส ทิสฺวา ปชหินฺติ ทีเปติ. ตาปสปพฺพชฺชํ ปพฺพชิตานํ หิ สาฏกสฺมึ นว โทสา อุปฏฺฐหนฺติ. เตสุ ตสฺส มหคฺฆภาโว เอโก โทโส, ปรปฏิพทฺธตาย อุปฺปชฺชนภาโว เอโก, ปริโภเคน ลหุกกิลิสฺสนภาโว เอโก, กิลิฏฺโฐ หิ ๓- โธวิตพฺโพ จ รชิตพฺโพ จ โหติ, ปริโภเคน ชิณฺณภาโว ๔- เอโก, ชิณฺณสฺส หิ ตุนฺนํ วา อคฺคฬทานํ วา กตฺตพฺพํ โหติ. ปุน ปริเยสนาย ทุรภิสมฺภวภาโว เอโก, ตาปสปพฺพชฺชาย อสารุปฺปภาโว เอโก, ปจฺจตฺถิกานํ สาธารณภาโว เอโก, ลหุกภาเวน ๕- ยถา หิ ตํ ปจฺจตฺถิกา น คณฺหนฺติ, เอวํ โคเปตพฺโพ โหติ. ปริภุญฺชนฺตสฺส วิภูสนฏฺฐานภาโว เอโก, คเหตฺวา จรนฺตสฺส ขนฺธภารมหิจฺฉภาโว เอโกติ.