Koṭṭhāsavāravaṇṇanā

[58-120] Idāni tasmiṃ kho pana samaye cattāro khandhā hontīti saṅgahavāro āraddho, so ca uddesaniddesapaṭiniddesānaṃ vasena tividho hoti.

Tattha uddesavāre "cattāro khandhā"tiādayo tevīsati koṭṭhāsā honti. Tesaṃ evamattho veditabbo:- yasmiṃ samaye kāmāvacaraṃ paṭhamaṃ mahākusalacittaṃ uppajjati, ye tasmiṃ samaye cittaṅgavasena uppannā ṭhapetvā yevāpanake pāliṃ āruḷhā atirekapaṇṇāsadhammā, te sabbepi saṅgayhamānā rāsaṭṭhena cattārova khandhā honti, heṭṭhā vuttena āyatanaṭṭhena dveva āyatanāni honti, sabhāvaṭṭhena suññataṭṭhena nissattaṭṭhena dveva dhātuyo honti, paccayasaṅkhātena āharaṇaṭṭhena tayovettha dhammā āhārā honti, avasesā no āhāRā.