[20] Iti me bhāsamānassa abhidhammakathaṃ imaṃ

avikkhittā nisāmetha dullabhā hi ayaṃ kathāti.

Nidānakathā

tattha abhidhammoti kenaṭṭhena abhidhammo? dhammātirekadhammavisesaṭṭhena. Atirekavisesaṭṭhadīpako hi ettha abhisaddo "bāḷhā me dukkhā vedanā abhikkamanti, no paṭikkamanti abhikkantavaṇṇenā"tiādīsu viya. Tasmā yathā samussitesu bahūsu chattesu ca dhajesu ca yaṃ atirekappamāṇaṃ visesavaṇṇasaṇṭhānañca chattaṃ, taṃ aticchattanti vuccati. Yo atirekappamāṇo nānāvirāgavaṇṇavisesasampannova dhajo, so atidhajoti vuccati. Yathā ca ekato sannipatitesu bahūsu rājakumāresu ceva devesu ca yo jātibhogayasaissariyādisampattīhi atirekataro ceva visesavaṇṇataro ca rājakumāro, so atirājakumāroti vuccati. Yo āyuvaṇṇaissariyayasasampattiādīhi atirekataro ceva visesavaṇṇataro ca devo, so atidevoti vuccati. Tathārūpo brahmāpi atibrahmāti vuccati. Evameva ayampi dhammo dhammātirekadhammavisesaṭṭhena abhidhammoti vuccati.