@6 ka. sacchikatthaparamatthenāti. evamuparipi, cha.Ma. saccikaṭṭhaparamatthenāti. evamuparipi Āmantā. Yo sacchikaṭṭho paramaṭṭho tato so puggalo nūpalabbhati sacchikaṭṭhaparamaṭṭhenāti? na hevaṃ vattabbe. Ājānāhi niggahaṃ .pe. Paṭikammaṃ. Sabbattha puggalo upalabbhati sacchikaṭṭhaparamaṭṭhenāti? āmantā. Yo sacchikaṭṭho paramaṭṭho tato so puggalo sabbattha upalabbhati sacchikaṭṭhaparamaṭṭhenāti? na hevaṃ vattabbe. Ājānāhi paṭikammaṃ. Sabbadā puggalo upalabbhati sabbadā puggalo nūpalabbhati sabbesu puggalo upalabbhati sabbesu puggalo nūpalabbhati sacchikaṭṭhaparamaṭṭhenāti? āmantā. Yo sacchikaṭṭho paramaṭṭho tato so puggalo nūpalabbhati sacchikaṭṭhaparamaṭṭhenāti? na hevaṃ vattabbe. Ājānāhi paṭikamman"ti evaṃ paṭhamaṃ vādaṃ nissāya paṭhamaṃ niggahaṃ dutiyaṃ nissāya dutiyaṃ niggahaṃ .pe. Aṭṭhamaṃ nissāya aṭṭhamaṃ niggahaṃ dassentena satthārā ṭhapitā. Iminā nayena sabbattha mātikāṭhapanaṃ veditabbaṃ. Taṃ panetaṃ mātikaṃ ṭhapento idaṃ disvāva ṭhapesi:- "mama parinibbānato aṭṭhārasavassādhikānaṃ dvinnaṃ vassasatānaṃ matthake moggalliputtatissatthero nāma bhikkhu bhikkhusahassamajjhe nisinno sakavāde pañca suttasatāni paravāde pañcāti suttasahassaṃ samodhānetvā dīghanikāyappamāṇaṃ kathāvatthuppakaraṇaṃ bhājessatī"ti.

Moggalaliputtatissattheropi imaṃ pakaraṇaṃ desento na attano ñāṇena desesi, satthārā pana dinnanayena ṭhapitamātikāya desesi. Iti satthārā dinnanayena ṭhapitamātikāya desitattā sakalampetaṃ pakaraṇaṃ buddhabhāsitameva nāma jātaṃ. Yathā kiṃ? yathā madhupiṇḍikasuttantādīni. Madhupiṇḍikasuttasmiṃ hi bhagavā "yatonidānaṃ bhikkhu purisaṃ papañcasaññāsaṅkhā samudācaranti, ettha ce natthi abhinanditabbaṃ abhivaditabbaṃ ajjhositabbaṃ, esevanto rāgānusayānan"ti mātikaṃ ṭhapetvā uṭṭhāyāsanā vihāraṃ pāvisi.

Dhammapaṭiggāhakā bhikkhū mahākaccānattheraṃ upasaṅkamitvā dasabalena ṭhapitamātikāya atthaṃ pucchiṃsu. Thero pucchitamatteneva akathetvā dasabalassa apacitiṃ dassanatthaṃ