@3 ka. mahākaccāyanattheraṃ. evamuparipi 4 cha.Ma. pucchitamattakeneva "seyyathāpi āvuso puriso sāratthiko sāragavesī"ti sāropamaṃ āharitvā sārarukkho viya bhagavā sākhāpalāsasadisā sāvakā. So hāvuso bhagavā jānaṃ jānāti, passaṃ passati cakkhubhūto ñāṇabhūto dhammabhūto brahmabhūto vattā pavattā atthassa ninnetā amatassa dātā dhammasāmī tathāgatoti satthāraṃ thometvā punappunaṃ therehi yācito satthārā ṭhapitamātikāya atthaṃ vibhajitvā "ākaṅkhamānā ca pana tumhe āyasmanto bhagavantaṃyeva upasaṅkamitvā etamatthaṃ puccheyyātha, sace sabbaññutañāṇena saddhiṃ saṃsandiyamānaṃ sameti, taṃ gaṇheyyātha. No ce mā gaṇhathā"ti iminā adhippāyena "yathā ca vo bhagavā byākaroti, tathā taṃ dhāreyyāthā"ti vatvā uyyojesi.
Te satthāraṃ upasaṅkamitvā etamatthaṃ pucchiṃsu. Satthā "dukathitaṃ kaccānenā"ti avatvā suvaṇṇāliṅgaṃ ussāpento viya gīvaṃ upanāmetvā supupphitasatapattasassirikaṃ viya mahāmukhaṃ pūrento brahmassaraṃ nicchāretvā "sādhu sādhū"ti therassa sādhukāraṃ datvā "paṇḍito bhikkhave mahākaccāno, mahāpañño bhikkhave mahākaccāno, mañcepi tumhe bhikkhave etamatthaṃ paṭipuccheyyātha, ahampi maṃ evamevaṃ byākareyyaṃ, yathā taṃ mahākaccānena byākatan"ti āha.
Evaṃ satthārā anumoditakālato paṭṭhāya pana sakalaṃ suttantaṃ buddhabhāsitaṃ nāma jātaṃ. Ānanadattherādīhi vitthāritasuttantesvapi eseva nayo. Evameva sammāsambuddho sattappakaraṇāni desento kathāvatthuṃ patvā vuttanayena mātikaṃ ṭhapesi. Ṭhapento ca idamaddasa:-