Tathā sīlavarājakāle campeyyanāgarājakāle bhūridattanāgarājakāle chaddantakāle jayadisarājaputtakāle alīnacittakumārakāleti sīlapāramitāya pūritattabhāvānaṃ pamāṇaṃ nāma natthi. Ekantena panassa saṅkhapālajātake:-

"sūlehi vijjhayantepi koṭṭayantepi sattibhi

bhojaputte na kuppāmi esā me sīlapāramī"ti evaṃ attapariccāgaṃ karontassa sīlapāramitā paramatthapāramitā nāma jātā.

Tathā somanassakumārakāle hatthipālakumārakāle ayogharapaṇḍitakāleti mahārajjaṃ pahāya nekkhammapāramitāya pūritattabhāvānaṃ pamāṇaṃ nāma natthi. Ekantena panassa cūḷasuttasomajātake:-