Imasmiṃ pana ṭhāne paṭṭhānaṃ samānetabbaṃ:- kusalattikādayo hi bāvīsatitikā nāma. Hetū dhammā nahetū dhammā .pe. Saraṇā dhammā araṇā dhammāti ime

Aparepi dukā vijjābhāgino dhammā avijjābhāgino dhammā .pe. Khaye ñāṇaṃ anuppāde ñāṇanti dvācattāḷīsasuttantikadukā nāma. Tesu dvāvīsatitikā satadukāti ayaṃ āhacca bhāsitā jinavacanabhūtā sabbaññutañāṇabuddhena desitā sattannaṃ pakaraṇānaṃ mātikā nāma. Athāpare dvācattāḷīsasuttantikadukā kuto pabhavā kena ṭhapitā kena desitāti. Dhammasenāpati sāriputtattherappabhavā, tena ṭhapitā tena desitāti. Ime ṭhapento pana thero na sāmukkaṃsikena attano ñāṇena ṭhapesi. Ekuttariyaṃ pana ekanipātādisaṅgīti dasuttarasuttantehi samodhānetvā ābhidhammikattherānaṃ suttantaṃ patvā akilamatthaṃ ṭhapitā. Tena panete ekasmiṃ nikkhepakaṇḍeyeva matthakaṃ pāpetvā vibhattā, sesaṭṭhānesu yāva saraṇadukā abhidhammo vibhatto.

Sammāsambuddhena hi anulomapaṭṭhāne dvāvīsatitike nissāya tikapaṭṭhānaṃ nāma niddiṭṭhaṃ. Sataduke nissāya dukapaṭṭhānaṃ nāma niddiṭṭhaṃ. Tato paraṃ dvāvīsatitike gahetvā dukasate pakkhipitvā dukatikapaṭṭhānaṃ nāma dassitaṃ. Tato paraṃ dukasataṃ gahetvā dvāvīsatiyā tikesu pakkhipitvā tikadukapaṭṭhānaṃ nāma dassitaṃ. Tike pana tikesuyeva pakkhipitvā tikatikapaṭṭhānaṃ nāma dassitaṃ. Duke pana dukesuyeva pakkhipitvā dukadukapaṭṭhānaṃ nāma dassitaṃ. Evaṃ:-

tikañca paṭṭhānavaraṃ dukuttamaṃ