gāmamaṇḍalā upagantvā rūpaṃ dassenti anappakan"ti evaṃ gāmadārakesu niṭṭhubhanādīhi ceva mālāgandhūpahārādīhi ca sukhadukkhaṃ uppādentesupi upekkhaṃ anativattantassa upekkhāpāramitā paramatthapāramitā nāma jātā. Ayamettha saṅkhepo, vitthārato panesa attho cariyāpiṭake gahetabbo.

Evaṃ pāramiyo pūretvā vessantarattabhāve ṭhito:-

"acetanāyaṃ paṭhavī aviññāya sukhadukkhaṃ

sāpi dānabalā mayhaṃ sattakkhattuṃ pakampathā"ti evaṃ mahāpaṭhavīkampanāni mahāpuññāni katvā āyuhapariyosāne ito cuto tusitabhavane nibbatti, tattha aññe deve dasahi ṭhānehi adhigaṇhitvā "yāvatāyukaṃ dibbasampattiṃ anubhavanto manussagaṇanāya saṭṭhivassasatasahassādhikāni sattapaññāsavassakoṭiyo idāni sattahi divasehi āyukkhayaṃ pāpuṇissatī"ti vatthāni kilissanti, mālā milāyanti, kacchehi sedā muñcanti, kāye vevaṇṇiyaṃ okkamati, devo devāsane na saṇṭhahatīti imesu pañcasu pubbanimittesu uppannesu tāni disvā "suññā vata bho saggā bhavissantī"ti saṃvegajātāhi devatāhi mahāsattassa pūritapāramibhāvaṃ ñatvā "imasmiṃ idāni aññaṃ devalokaṃ anupagantvā manussaloke uppajjitvā buddhabhāvaṃ patte puññāni katvā cutā cutā manussā devalokaṃ paripūressantī"ti cintetvā:-