"iti me bhāsamānassa abhidhammakathaṃ imaṃ

avikkhittā nisāmetha dullabhā hi ayaṃ kathā"ti.

Evaṃ paṭiññātāya abhidhammakathāya kathanokāso sampatto. Tattha yasmā abhidhammo nāma abhidhammasaṅgaṇīādīni sattappakaraṇāni, dhammasaṅgaṇiyāpi cittuppādakaṇḍādīnaṃ vasena cattāri kaṇḍāni, cittuppādakaṇḍampi mātikāpadabhājanīyavasena duvidhaṃ, tattha mātikā ādi, sāpi tikamātikā dukamātikāti duvidhā, tattha tikamātikā ādi, tikamātikāyapi kusalattikaṃ ādi, kusalattikepi "kusalā dhammā"ti idaṃ padaṃ, tasmā:-

ito paṭṭhāya gambhīraṃ abhidhammakathaṃ imaṃ