Evaṃ vavaṭṭhitā panete sappadesavasena dveva koṭṭhāsā honti. Etesu hi nava tikā ekasattati ca dukā sappadesānaṃ rūpārūpadhammānaṃ pariggahitattā sappadesā nāma. Avasesā terasa tikā ekasattati ca dukā nippadesā nāma. Tattha tikesu tāva vedanāttiko vitakkattiko pītittiko uppannattiko atītattiko cattāro ārammaṇattikāti ime nava tikā sappadesā nāma. Dukesu hetugocchakādīnaṃ upādānagocchakapariyosānānaṃ navannaṃ gocchakānaṃ pariyosāne tayo tayo dukā, kilesagocchakapariyosāne cattāro cattāro dukā, cittasampayuttā dhammā cittavippayuttā dhammā, cittasaṃsaṭṭhā dhammā cittavisaṃsaṭṭhā dhammāti dve dve mahantaradukā, suttantikadukesu adhivacanadukaṃ niruttidukaṃ paññattidukaṃ nāmarūpadukanti ime cattāro duke ṭhapetvā avasesā aṭṭhatiṃsa dukā cāti ete sappadesā nāma. Vuttāvasesā tikadukā sabbepi nippadesāti veditabbā.

Idāni "kusalā dhammā"tiādīnaṃ mātikāpadānaṃ ayaṃ anupubbapadavaṇṇanā. Kusalasaddo tāva ārogyānavajjachekasukhavipākesu dissati. Ayañhi "kacci nu bhoto kusalaṃ,

@3 cha.Ma. iti-saddo na dissati 4 cha.Ma. sappadesanippadesavasena Kacci bhoto anāmayan"tiādīsu ārogye dissati. "katamo pana bhante kāyasamācāro kusalo? yo kho mahārāja kāyasamācāro anavajjo"ti ca "puna caparaṃ bhante etadānuttariyaṃ, yathā bhagavā dhammaṃ deseti kusalesu dhammesū"ti ca evamādīsu anavajje. "kusalo tvaṃ rathassa aṅgapaccaṅgānaṃ, kusalā naccagītassa, susikkhitā caturitthiyo"tiādīsu cheke. "kusalānaṃ bhikkhave dhammānaṃ samādānahetu kusalassa kammassa katattā"tiādīsu sukhavipāke. Svāyamidha ārogyepi anavajjepi sukhavipākepi vattati.