Dhammasaddo panāyaṃ pariyattihetuguṇanissattanijjīvatādīsu dissati. Ayañhi "dhammaṃ pariyāpuṇāti suttaṃ geyyan"tiādīsu pariyattiyaṃ dissati. "hetumhi ñāṇaṃ dhammapaṭisambhidā"tiādīsu hetumhi.

"na hi dhammo adhammo ca ubho samavipākino

adhammo nirayaṃ neti dhammo pāpeti suggatin"ti ādīsu guṇe. "tasmiṃ kho pana samaye dhammā honti, dhammesu dhammānupassī viharatī"tiādīsu nissattanijjīvatāya. Svāyamidhāpi nissattanijjīvatāyameva vattati.

Vacanattho panettha kucchite pāpake dhamme salayanti calayanti kampenti viddhaṃsentīti kusalā. Kucchitena vā ākārena sayantīti kusā, te akusalasaṅkhāte kuse lunanti chindantīti kusalā. Kucchitānaṃ vā sānato tanukaraṇato osānakaraṇato ñāṇaṃ kusaṃ nāma, tena kusena vā lātabbāti kusalā, gahetabbā pavattetabbāti attho. Yathā vā kusā ubhayabhāgagataṃ hatthappadesaṃ lunanti, evamimepi uppannānuppannabhāvena ubhayabhāgagataṃ saṅkilesapakkhaṃ lunanti, tasmā kusā viya lunanti chindantītipi kusalā. Attano pana sabhāvaṃ dhārentīti dhammā. Dhariyanti vā paccayehi dhārayanti vā yathāsabhāvatoti dhammā. Na kusalā akusalā, mittapaṭipakkhā amittā viya