Yā hi esā sādhāraṇaphalanipphādakattena saṇṭhitā paccayānaṃ sāmaggī, sā idha "samavāyo"ti ñātabbā. "ekova kho bhikkhave khaṇo ca samayo ca brahmacariyavāsāyā"ti evaṃ vutto pana navamo khaṇo "eko khaṇo"ti veditabbo. Yāni vā panetāni "cattārimāni bhikkhave cakkāni, yehi samannāgatānaṃ devamanussānaṃ catucakkaṃ pavattatī"ti ettha paṭirūpadesavāso sappurisūpassayo attasammāpaṇidhi pubbe ca katapuññatāti cattāri cakkāni vuttāni, tāni vā ekajjhaṃ katvā okāsaṭṭhena "khaṇo"ti veditabbāni. Tāni hi catucakkāni kusaluppattiyā okāsabhūtāni.

Evaṃ samavāyañca khaṇañca ñatvā itaresu:-

taṃ taṃ upādāya paññatto kālo vohāramattako

puñjo phassādidhammānaṃ samūhoti vibhāvito.