Tattha siyā "yaṃ vuttaṃ `anekahetuto vuttiṃ dīpetī'ti, taṃ na yuttaṃ. Kiṃkāraṇā? asāmaggiyaṃ ahetūnaṃ sāmaggiyampi ahetubhāvāpattito, na hi ekasmiṃ andhe Daṭṭhuṃ asakkonte andhasataṃ passatī"ti. No na yuttaṃ. Sādhāraṇaphalanipphādakattena hi ṭhitabhāvo sāmaggī, na anekesaṃ samodhānamattaṃ, na ca andhānaṃ dassanaṃ nāma sādhāraṇaphalaṃ. Kasmā? andhasate satipi tassa abhāvato. Cakkhādīnaṃ pana taṃ sādhāraṇaphalaṃ, tesaṃ bhāve bhāvato. Asāmaggiyaṃ ahetūnampi ca sāmaggiyaṃ hetubhāvo siddho. Svāyaṃ asāmaggiyaṃ phalābhāvena sāmaggiyañcassa bhāvena veditabbo, cakkhādīnaṃ hi vekalle cakkhuviññāṇādīnaṃ abhāvo avekalle ca bhāvo paccakkhasiddho lokassāti. Ayaṃ tāva samavāyasaṅkhātena samayena attho dīpito.

Yo panesa aṭṭhahi akkhaṇehi vivajjito navamo khaṇo paṭirūpadesavāsādiko ca catucakkasaṅkhāto okāsaṭṭhena khaṇo vutto, so manussattabuddhuppādasaddhammassavana- sammādiṭṭhītiādikaṃ khaṇasāmaggiṃ vinā natthi, manussattādīnaṃ ca kāṇakacchapopamādīhi dullabhabhāvo. iti khaṇassa dullabhattā suṭṭhutaraṃ khaṇāyattaṃ lokuttaradhammānaṃ upakārabhūtaṃ kusalaṃ dullabhameva. Evametesu khaṇasaṅkhāto samayo kusaluppattiyā dullabhabhāvaṃ dīpeti. Evaṃ dīpentena ṭhānena adhigatakhaṇānaṃ khaṇāyattassa tassa kusalassa anuṭṭhānena moghakhaṇaṃ kurumānānaṃ pamādavihāro paṭisedhito hoti. Ayaṃ khaṇasaṅkhātena samayena attho dīpito.

Yo panetassa kusalassa cittassa pavattikālo nāma hoti, so atiparitto, sā cassa atiparittatā "yathā ca bhikkhave tassa purisassa javo, yathā ca candimasuriyānaṃ javo, yathā ca yā devatā candimasuriyānaṃ purato dhāvanti, tāsaṃ devatānaṃ javo, tato sīghataraṃ āyusaṅkhārā khīyantī"ti imassa suttassa aṭṭhakathāvasena veditabbā. Tatra hi so rūpajīvitindriyassa tāva parittako kālo vtto. Yāva paccppannaṃ