Kāmañcettha ekameva etaṃ cittaṃ na hoti, cittānaṃ pana antogadhattā etesu yaṅkiñci ekampi cittatāya "cittan"ti vattuṃ vaṭṭati. Evaṃ tāva cittatāya cittaṃ.

Kathaṃ cittakaraṇatāyāti? lokasmiṃ hi cittakammato uttariṃ aññaṃ cittaṃ nāma natthi, Tasmimpi caraṇaṃ nāma cittaṃ aticittameva hoti. Taṃ karontānaṃ cittakārānaṃ "evaṃvidhāni ettha rūpāni kattabbānī"ti cittasaññā uppajjati, tāya cittasaññāya lekhāgahaṇarañjanaujjotanavattanādinipphāditā cittakiriyā uppajjanti. Tato caraṇasaṅkhāte citte aññataraṃ vicittarūpaṃ nipphajjati. Tato "imassa rūpassa upari idaṃ hotu, heṭṭhā idaṃ hotu, ubhayapasse idan"ti cintetvā yathācintitena kammena sesacittarūpanipphādanaṃ hoti. Evaṃ yaṅkiñci loke vicittaṃ sippajātaṃ, sabbantaṃ citteneva kariyati. Evamimāya karaṇavicittatāya tassa tassa cittassa nipphādakaṃ cittampi tatheva cittaṃ hoti. Yathācintitassa vā anavasesassa abhinipphajjanato tatopi cittameva cittataraṃ. Tenāha bhagavā:-

"diṭṭhaṃ vo bhikkhave caraṇaṃ nāma cittanti. Evambhante. Tampi kho

bhikkhave caraṇaṃ nāma cittaṃ citteneva cintitaṃ, tenapi kho bhikkhave caraṇena cittena