Yadā etadeva vidhānaṃ kulavaṃsādivasena vattavasena karoti, tadā sīlamayaṃ hoti. Yadā sabbametaṃ katvā "ayaṃ ettako saddo brahmalokappamāṇopi hutvā khayaṃ gamissati, vayaṃ gamissatī"ti sammasanaṃ paṭṭhapeti, tadā bhāvanāmayaṃ hoti.

Tattha dānamayaṃ tāva yadā bheriādīni gahetvā sahatthā upahāraṃ karoti, niccūpahāratthāya ṭhapentopi sahatthā ṭhapeti, "saddadānaṃ me"ti dhammassavanaṃ ghosetuṃ gacchati, dhammakathaṃ sarabhaññaṃ kātuṃ vā gacchati, tadā kāyakammaṃ hoti. Yadā "gacchatha tātā, amhākaṃ saddadānaṃ tiṇṇaṃ ratanānaṃ upahāraṃ karothā"ti āṇāpeti, "saddadānaṃ me"ti cetiyaṅgaṇe "imaṃ bheriṃ, imaṃ mudiṅgaṃ ṭhapethā"ti āṇāpeti, sayameva dhammassavanaṃ ghoseti, dhammakathaṃ katheti, sarabhaññaṃ bhaṇati, tadā vacīkammaṃ hoti. Yadā kāyaṅgavācaṅgāni acopetvā "saddadānaṃ dassāmī"ti vijjamānakavatthuṃ manasā pariccajati, tadā manokammaṃ hoti.

Sīlamayampi "saddadānaṃ nāma mayhaṃ kulavaṃso kulatanti kulappaveṇī"ti bheriādīni sahatthā upahāraṃ karontassa bheriādīni sahatthā cetiyaṅgaṇādīsu ṭhapentassa dhammakathikānaṃ sarabhesajjaṃ sahatthā dadantassa vattasīsena dhammassavanaghosanadhammakathākathanasarabhaññabhaṇanatthāya ca gacchantassa kāyakammaṃ hoti. "saddadānaṃ nāma amhākaṃ kulavaṃso kulatanti kulappaveṇi, gacchatha tātā, buddharatanādīnaṃ upahāraṃ karothā"ti āṇāpentassa kulavaṃsavaseneva attanā dhammakathaṃ vā sarabhaññaṃ vā karontassa ca vacīkammaṃ hoti. "saddadānaṃ nāma mayhaṃ kulavaṃso, saddadānaṃ dassāmī"ti kāyaṅgavācaṅgāni acopetvā manasāva vijjamānakavatthuṃ pariccajantassa manokammaṃ hoti.