Imaṃ pana pañhaṃ yo jānāti, so evaṃ vakkhati "bhāvanāmayā iddhi kusalā vā hoti abyākatā vā, adukkhamasukhavedanīyāeva, avitakkaavicārāeva, rūpāvacarāevā"ti. So vattabbo "pāṇātipātacetanā kusalādīsu kataraṃ koṭṭhāsaṃ bhajatī"ti. Jānanto vakkhati "pāṇātipātacetanā akusalā ca dukkhavedanīyā ca savitakkasavicārā ca kāmāvacarāevā"ti. Evaṃ sante tava pañho neva kusalattikena sameti, na vedanāttikena, na vitakkattikena, na bhummantarenāti.

Kiṃ pana evaṃ mahantaṃ suttaṃ niratthakanti? no niratthakaṃ. Tvaṃ panassa Atthaṃ na jānāsi, iddhimā cetovasippattoti ettha hi na bhāvanāmayā iddhi adhippetā, āthabbaniddhi ca pana adhippetā. Sā hi ettha labbhamānā labbhati. Sā pana kāyavacīdvārāni muñcitvā kātuṃ na sakkā, āthabbaniddhikā hi sattāhaṃ aloṇakaṃ bhuñjitvā dabbe attharitvā paṭhaviyaṃ sayamānā tapaṃ caritvā sattame divase susānabhūmiṃ sajjetvā sattame pade ṭhatvā hatthaṃ vaṭṭetvā mukhena vijjaṃ parijappanti, atha nesaṃ kammaṃ samijjhati. Evaṃ ayampi iddhi kāyavacīdvārāni muñcitvā kātuṃ na sakkāti "na kāyakammaṃ manodvāre samuṭṭhātī"ti niṭṭhamettha gantabbaṃ.

Hatthamuddhāya pana musāvādādīni kathentassa kammaṃ vacīkammaṃ, dvāraṃ pana kāyadvāraṃ hoti. Evaṃ akusalaṃ vacīkammampi kāyadvāre samuṭṭhāti. Tehi pana cittehi