@3 Sī. athabbaṇiddhi, cha. āthabbaṇiddhi 4 Ma. paccaritvā Sahajātā abhijjhābyāpādamicchādiṭṭhiyo cetanāpakkhikā vā bhavanti abbohārikā vā. Vacībhedaṃ pana katvā musāvādādīni kathentassa kammampi vacīkammaṃ, dvārampi vacīdvārameva. Evaṃ akusalaṃ vacīkammaṃ vacīdvāre samuṭṭhāti. Tehi pana cittehi sahajātā abhijjhābyāpādamicchādiṭṭhiyo cetanāpakkhikā vā bhavanti abbohārikā vā. Ettakā ācariyānaṃ samānaṭṭhakathā nāma.

Vitaṇḍavādī panāha "akusalaṃ vacīkammaṃ manodvārepi samuṭṭhātī"ti. So "tayo saṅgahe āruḷhasuttaṃ āharāhī"ti vutto idaṃ uposathakkhandhakato suttaṃ āhari:- "yo pana bhikkhu yāvatatiyaṃ anussāviyamāne saramāno santiṃ āpattiṃ nāvikareyya, sampajānamusāvādassa hotī"ti.

Idaṃ suttaṃ āharitvā āha "evaṃ āpattiṃ anāvikaronto tuṇhībhūtova aññaṃ āpattiṃ āpajjati, ettha kuto kāyaṅgacopanaṃ vā vācaṅgacopanaṃ vā, manodvārasmiṃyeva pana idaṃ akusalaṃ vacīkammaṃ samuṭṭhātī"ti.

So vattabbo "kiṃ panetaṃ suttaṃ neyyatthaṃ, udāhu nītatthan"ti. Nītatthameva mayhaṃ suttanti. So "mā evaṃ avaca, tulayissāmassa atthan"ti vatvā evaṃ pucchitabbo "sampajānamusāvāde kiṃ hotī"ti. Jānanto "sampajānamusāvāde dukkaṭaṃ hotī"ti vakkhati. Tato vattabbo "vinayassa dve mūlāni kāyo ca vācā ca, sammāsambuddhena hi sabbāpattiyo imesuyeva dvīsu dvāresu paññattā, manodvāre āpattipaññapanaṃ nāma natthi, tvaṃ ativiya vinaye pakataññū, yo satthārā apaññatte ṭhāne āpattiṃ paññapesi, sammāsambuddhaṃ abbhācikkhasi, jinacakkaṃ paharasī"tiādivacanehi niggaṇhitvā uttariṃ pañhaṃ so evaṃ pucchitabbo "sampajānamusāvādo kiṃ kiriyato samuṭṭhāti, udāhu akiriyato"ti. Jānanto "kiriyato "ti vakkhati, tato vattabbo "anāvikaronto kataraṃ kiriyaṃ karotī"ti. Addhā hi kiriyaṃ apassanto vighātaṃ āpajjissati, tato imassa suttassa atthena saññāpetabbo. Ayañhettha attho:- yvāyaṃ "sampajānamusāvādo hotī"ti vutto, so āpattito kiṃ hoti, katarāpatti hotīti attho.