Mañjeṭṭhapabhassarā pana tamhā tamhā sarīrappadesā nikkhamiṃsu. Iti tā chabbaṇṇarasmiyo nikkhamitvā ghanamahāpaṭhaviṃ gaṇhiṃsu.

Catunahutādhikadviyojanasatasahassabahalā mahāpaṭhavī niddhantasuvaṇṇapiṇḍi viya ahosi. Atha paṭhaviṃ bhinditvā heṭṭhā udakaṃ gaṇhiṃsu. Paṭhavīsandhārakaṃ aṭṭhanahutādhikacatuyojana- satasahassabahalaṃ udakaṃ suvaṇṇakalalehi āsiñcamānavilīnasuvaṇṇaṃ viya ahosi. Udakaṃ vinivijjhitvā vātamaggahesuṃ. Chanahutādhikanavayojanasatasahassabahalo vāto samussitasuvaṇṇakkhandho viya ahosi. Vātaṃ vinivijjhitvā heṭṭhā ajjaṭākāsaṃ pakkhandiṃsu.

Uparibhāgena uggantvāpi cātumahārājike gaṇhiṃsu. Tepi vinivijjhitvā tāvatiṃse, tato yāme, tato tusite, tato nimmānaratī, tato paranimmitavasavattī, tato nava brahmaloke, tato vehapphale, tato pañcasuddhāvāse vinivijjhitvā cattāro arūpe gaṇhiṃsu. Cattāro arūpe vinivijjhitvā ajjaṭākāsaṃ pakkhandiṃsu.

Tiriyabhāgehi anantā lokadhātuyo pakkhandiṃsu. Ettakesu ṭhānesu candamhi candappabhā natthi. Suriye suriyappabhā natthi, tārakarūpesu tārakarūpappabhā natthi, devatānaṃ uyyānavimānakapparukkhesu sarīresu ābharaṇesūti sabbattha pabhā natthi. Tisahassimahāsahassī lokadhātuyo ālokapharaṇasamattho mahābrahmāpi suriyassuggamane khajjopanako viya ahosi. Candimasuriyatārakarūpānaṃ devauyyānavimānakapparukkhānaṃ paricchedamattakameva paññāyittha. Ettakañhi ṭhānaṃ buddharasmīhiyeva ajjhotthaṭaṃ ahosi. Ayampi neva