@3 cha.Ma. ghātessāmīti 4 cha.Ma. ayaṃ pāṭho na dissati Anabhijjhā ñāṇasampayuttacittena viramantassa dvimūlā hoti, ñāṇavippayuttacittena viramantassa ekamūlā. Alobho pana attanāva attano mūlaṃ na hoti. Abyāpādepi eseva nayo. Sammādiṭṭhi alobhādosavasena dvimūlāvāti ime dasa kusalakammapathā nāma.

Kammapathasaṃsandanakathā

idāni imasmiṃ ṭhāne kammapathasaṃsandanaṃ nāma veditabbaṃ. Pañcasamphassadvāravasena hi uppanno asaṃvaro akusalaṃ manokammameva hoti. Manosamphassadvāravasena uppanno tīṇipi kammāni honti. So hi kāyadvāre copanaṃ patto akusalaṃ kāyakammaṃ hoti, vacīdvāre akusalaṃ vacīkammaṃ, ubhayattha copanaṃ appatto akusalaṃ manokammaṃ hoti. Pañcaasaṃvaradvāravasena uppanno akusalaṃ manokammameva hoti. Copanakāyaasaṃvaradvāravasena uppanno akusalaṃ kāyakammameva hoti. Vācāasaṃvaradvāravasena uppanno akusalaṃ vacīkammameva hoti. Manoasaṃvaradvāravasena uppanno akusalaṃ manokammameva hoti. Tividhaṃ kāyaduccaritaṃ akusalaṃ kāyakammameva hoti. Catubbidhaṃ vacīduccaritaṃ akusalaṃ vacīkammameva hoti. Tividhaṃ manoduccaritaṃ akusalaṃ manokammameva hoti.

Pañcasamphassadvāravasena uppanno saṃvaropi kusalaṃ manokammameva hoti. Manosamphassadvāravasena uppanno pana ayampi asaṃvaro viya tīṇipi kammāni honti. Pañcasaṃvaradvāravasena uppannopi kusalaṃ manokammameva hoti. Copanakāyasaṃvaradvāravasena uppanno kusalaṃ kāyakammameva hoti. Vācāsaṃvaradvāravasena uppanno kusalaṃ vacīkammameva hoti. Manosaṃvaradvāravasena uppanno kusalaṃ manokammameva hoti. Tividhaṃ kāyasucaritaṃ kusalaṃ kāyakammameva hoti. Catubbidhaṃ vacīsucaritaṃ kusalaṃ vacīkammameva hoti. Tividhaṃ manosucaritaṃ kusalaṃ manokammameva hoti.