@4 Ma. tiṇṇaṃ sannipātasaṅkhātassa 5 saṃ.ni. 16/43/69 Vasena paveditoti. Imassa ca suttapadassa tiṇṇaṃ saṅgatiyā phassoti ayamattho, na saṅgatimattameva phassoti.

Evaṃ paveditattā pana tenevākārena paccupaṭṭhātīti sannipātapaccupaṭṭhānoti vutto, phalaṭṭhena pana paccupaṭṭhānenesa vedanāpaccupaṭṭhāno nāma hoti. Vedanaṃ hesa paccupaṭṭhāpeti, uppādetīti attho. Uppādiyamāno ca yathā bahiddhā uṇhapaccayāpi lākhāsaṅkhātadhātunissitā usmā attano nissaye mudubhāvakārī hoti, na attano paccayabhūtepi bahiddhā vītacchitaṅgārasaṅkhāte uṇhabhāve. Evaṃ vatthārammaṇasaṅkhāto añño paccayopi samāno cittanissitattā attano nissayabhūte citteyeva esa vedanuppādako hoti, na attano paccayabhūtepi vatthumhi ārammaṇe vāti veditabbo. Tajjāsamannāhārena pana indriyena ca parikkhitte visaye anantarāyena uppajjanato esa "āpāthagatavisayapadaṭṭhāno"ti vuccati.

Vediyatīti vedanā, sā vedayitalakkhaṇā, anubhavanarasā iṭṭhākārasambhogarasā vā, cetasikaassādapaccupaṭṭhānā, passaddhipadaṭṭhānā.

Catubhūmikavedanā hi novedayitalakkhaṇā nāma natthi. "anubhavanarasatā pana sukhavedanāyameva labbhatī"ti vatvā puna taṃ vādaṃ paṭikkhipitvā "sukhavedanā vā hotu dukkhavedanā vā adukkhamasukhavedanā vā, sabbā anubhavanarasā"ti vatvā ayamattho dīpito. Ārammaṇarasānubhavanaṭṭhānaṃ patvā sesasampayuttadhammā ekadesamattakameva anubhavanti. Phassassa hi phusanamattakameva hoti, saññāya sañjānanamattakameva. Cetanāya cetanāmattakameva, viññāṇassa vijānanamattakameva. Ekaṃsato pana issaravatāya visavitāya sāmibhāvena vedanāva ārammaṇarasaṃ anubhavati.