Rājā viya hi vedanā, sūdo viya sesadhammā. Yathā sūdo nānaggarasabhojanaṃ sampādetvā peḷāya pakkhipitvā lañchanaṃ datvā rañño santike otāretvā lañchanaṃ bhinditvā peḷaṃ vivaritvā sabbasūpabyañjanehi aggaṃ ādāya bhājane pakkhipitvā

Tattha hi sūdassa bhattavīmaṃsanamattamiva avasesadhammānaṃ ārammaṇarasassa ekadesānubhavanaṃ. Yathā hi sūdo bhattekadesamattameva vīmaṃsati, evaṃ sesadhammāpi ārammaṇarasekadesameva anubhavanti. Yathā pana rājā issaravatāya visavitāya sāmī hutvā yadicchitaṃ bhuñjati, evaṃ vedanāpi issaravatāya visavitāya sāmibhāvena ārammaṇarasaṃ anubhavati, tasmā "anubhavanarasā"ti vuccati.

Dutiye atthavikappe ayaṃ idha adhippetā vedanā yathā vā tathā vā ārammaṇassa iṭṭhākārameva sambhuñjatīti "iṭṭhākārasambhogarasā"ti vuttā. Cetasikaassādato panesā attano sabhāveneva upaṭṭhānaṃ sandhāya "cetasikaassādapaccupaṭaṭhānā"ti vuttā. Yasmā pana passaddhakāyo sukhaṃ vedeti, tasmā "passaddhipadaṭṭhānā"ti veditabbā.

Nīlādibhedaṃ ārammaṇaṃ sañjānātīti saññā, sā sañjānanalakkhaṇā, paccābhiññāṇarasā. Catubhūmikasaññā hi nosañjānanalakkhaṇā nāma natthi, sabbā sañjānanalakkhaṇāva. Yā panettha abhiññāṇena sañjānāti, sā paccābhiññāṇarasā nāma hoti.