Saṇhasukhumadhammaṃ pana sammasato lokanāthassa lohitaṃ pasīdi, vatthurūpaṃ pasīdi, chavivaṇṇo pasīdi, cittasamuṭṭhānā vaṇṇadhātu samantā asītihatthamatte padese niccalā aṭṭhāsi. Iminā nīhārena sattāhaṃ sammasi.

Sattarattindivaṃ sammasitadhammo kittako ahosīti? ananto aparimāṇo ahosi. Ayaṃ tāva manasā desanā nāma. Satthā pana evaṃ sattāhaṃ manasā cintitaṃ dhammaṃ vacībhedaṃ katvā desento vassasatenapi vassasahassenapi vassasatasahassenapi matthakaṃ pāpetvā desetuṃ na sakkotīti na vattabbaṃ. Aparabhāgasmiṃ hi tathāgato tāvatiṃsabhavane pāricchattakamūle paṇḍukambalasilāyaṃ dasasahassacakkavāḷadevatānaṃ majjhe nisinno mātaraṃ kāyasakkhiṃ katvā "kulasā dhammā akusalā dhammā abyākatā dhammā"ti dhammaṃ desento satabhāgena sahassabhāgena satasahassabhāgena dhammantarā dhammantaraṃ saṅkhipitvā saṅkhipitvā desesi. Tayo māse nirantaraṃ pavattadesanā vegena pavattaākāsagaṅgā viya adhomukhaṭhapitaudakaghaṭā nikkhantaudakadhārā viya ca hutvā anantā aparimāṇā ahosi.

Buddhānaṃ hi bhattānumodanakālepi thokaṃ vaḍḍhetvā anumodantānaṃ desanā dīghamajjhimanikāyappamāṇā ahosi. Pacchābhattaṃ pana sampattaparisāya dhammaṃ desentānaṃ desanā saṃyuttaaṅguttaranikāyadvemahānikāyappamāṇā ahosi. Kasmā? buddhānaṃ hi bhavaṅgaparivāso lahuko, dantāvaraṇaṃ suphussitaṃ, mukhādānaṃ siliṭṭhaṃ, jivhā mudukā, saro madhuro, vacanaṃ lahukaparivattaṃ, tasmā taṃ muhuttaṃ desitadhammopi ettako ahosi. Temāsaṃ desitadhammo pana ananto aparimāṇoyeva ahosi.

Ānandatthero hi bahussuto tipiṭakadharo pañcadasagāthāsahassāni saṭṭhipadasahassāni latāpupphāni ākaḍḍhanto viya ṭhitappadeneva ṭhatvā gaṇhāti vā vāceti vā deseti vā. Ettako therassa eko uddesamaggo nāma hoti. Therassa hi anupadaṃ uddesaṃ dadamāno añño dātuṃ na sakkoti na sampāpuṇāti,